Asian Cup group stage khelh zawh a ni ta : Last 16-ah Australia Vs Indonesia; Tajikistan Vs UAE
Asian Cup group stage chu khelh zawh a ni ta a, a ṭha 16 chauh an dam tawh. Qatar, Australia, Iran, Iraq, Bahrain leh Saudi Arabia te chu mahni awmna group ṭheuha hmahruaitu an ni a; Tajikistan, Uzbekistan, United Arab Emirates, Japan, South Korea leh Thailand te chu pahnihna nichungin an tling.
Pathumna paruk aṭangin pali thlanchhuah an ni a; Jordan, Palestine, Syria leh Indonesia te pathumna nichungin an tling. India erawhin point an hmu lo a; Hong Kong leh Vietnam ten point an hmu bik lo.
Last 16 hi Pathianni aṭangin khelh ṭan leh tur a ni. Australia leh Indonesia te January 28, Pathianni tlai dar 5:00-ah an inkhel dawn a, zan dar 9:30-ah Tajikistan leh UAE te an inkhel zui ang.
A ruh no an chhuak
European C'ship leh AFCON ang thoin Asian Cup-ah team 24 an tel a, team pariat chauh first round-ah an tla. Team 16 zetin second round an luh avangin team ṭha chin chu an la dam vekah a ngaih theih.
India erawh a tla zingah an tel a, point khat pawh an hmu lo. World Cup 2026-ah team 48 an tel dawn a, Asia pawhin direct slot pariat bakah playoff slot pakhat a nei dawn. Mahse, Asian Cup-a a sang 16 zingah an la tel phak loh avangin World Cup khel tur a thiam pakua zinga beisei ngam chi an la ni lo.
Chutihrualin Asia ram lian Japan, South Korea, Saudi Arabia, Iran leh Australia te chu a ṭha zingah an la tel zel. Mahse, South Korea hi pakhatna an nih phak loh avangin last 16-ah Saudi Arabia nen an inkhel dawn a, team ṭha pakhat chuan quarterfinal an thleng dawn lo tihna a ni.
Last 16
Jassim Bin Hamad Stadium-ah Australia leh Indonesia an inkhel dawn. Socceroos hi goalkeeper tawnhriat nei ṭha Mathew Ryan-a'n a ho a, group B pakhatna ni turin Syria leh India an hneh bakah Uzbekistan nen an inhnehtawk. Australia hi team ṭha tak la ni reng mah se team ṭha bik an ni tawh lo.
Indonesia hian Iraq leh Japan te hneh lo mah se Vietnam an hneh zarah last 16 an lut. South Korean coach Shin Tae-yong kaihhruai Indonesia hi Australia khing tawk thei tura ngaih an ni.
Tajikistan leh UAE inkhel tur pawh hriatthiam a har hle. Tajikistan hi China ti tlatu an ni a, chutihrualin FIFA ranking thlir chuan India elpui tawk ni awm tak an ni. UAE erawh ranking-ah pawh an sang deuh zawk a, tun ṭumah pawh a buk rit zawk chu an ni ang.