Goal 11 luhnaah Mizoram an vanduai

Khelo India Youth Games 2023 hmeichhe hockey semifinal-ah Mizoramin team ṭha Haryana lakah hmahruai lai te nei mah se a tawpah a vanduai zawkah an ṭang a, 7-4 in an chak lo. Semifinal inkhel dangah Madyha Pradesh-in Odisha 3-1 in an hneh ve bawk.

Vawiin chhun dar 12:00 hian Mayor Radhakrishnan Stadium, Chennai-ah pathumna zawn a ni dawn a, Mizoram hian Odisha an hmachhawn ang. Final hi zanin dar 6:00-ah khelh tur a ni a, Madhya Pradesh leh Haryana te an inkhel dawn. Gold medal inchuh tur team pahnih hi an group pakhatna ve ve an ni.

Nimin inkhelah hian Haryana-in bul an ṭan ṭha a, first quarter-ah 2-0 in hma an hruai nghal. Mahse, second quarter-ah Mizoram hian na takin an nawr let a, third quarter-ah phei chuan 4-3 in an lehthal hial.

Mizoram tan Vanlalhriatpuii, F. Lalbiaksiami, Lalpeksangi leh T. Lalrinpuii ten goal an khung a, final beiseina a sang hman. Mahse, Haryana-in Mizoram insiamrem hmain goal an khung lehnghal a, fourth quarter-ah goal thum khung belhin 7-4 in an chak.

Mizoram manager R. Lalnunmawii chuan, "Haryana laka khati khawpa kan khel ṭha kha kan lawm a, chutihrualin chak thei dinhmuna kan ding nia kan hriat avangin kan ui hle. Kan naute ka fak a, an khelh danah ka lawm a, third place-a huaisen taka an khelh leh chuan bronze medal tal chu kan hlawhchhuah theih kan ring," tiin Vanglaini a hrilh.

SYS coach Lalroṭhuami (coach) leh manager Mawii ten Mizoram team hi an ho a, player tam zawk hi SAI Hockey Centre, Thenzawl-a inzir an ni.