Kalinga Super Cup : Odisha-in an mualah champion nawn an tum

2024 Kalinga Super Cup final chu January 28, Pathianni zan dar 7:30 hian East Bengal leh Odisha te an khel dawn. Inkhelhna tur hmun Kalinga Stadium hi Odisha khelmual a ni a, Kalinga Warriors ten an mualah nomawi chawi ngei an tum ang .

Odisha hian final lut turin Mumbai City 1-0 in an hneh a, goal awmchhun hi Diego Maurício khung a ni. East Bengal hian Hijazi Maher leh Javier Siverio Toro te goal hmangin Jamshedpur FC 2-0 in an hneh ve bawk.

Mizo tamna

Odisha-ah hian Mizo an ṭhahnem hle. Mumbai City an hneh ṭum pawh hian Jerry Lalrinzuala, Isak Vanlalruatfela leh K. Lalṭhathanga (Puitea) bakah goalkeeper Lalthuammawia Ralte ten inkhel bul an ṭan.

Bench-ah Jerry Mawihminghthanga leh R. Laldinliana te an la awm bawk. Tun season ISL-ah Odisha hi che ṭha ber zinga mi an ni a, match 12-ah point 24 hmuin pathumnaah an awm mek a, player an neih ṭhat bawk avangin Super Cup-ah pawh hian champion tura rin zawk an ni.

Odisha hian group stage-ah an khingpui Bengaluru (1-0), Inter Kashi (3-0) leh Goa (3-2) te an hneh vek a, I League club an hneh ṭum hian Vanlalṭhathanga leh Isak Vanlalruatfela ten goal an khung nghe nghe.

Mumbai City aṭanga Odisha zawmtu Ahmed Jahouh hi ISL foreinger zingah a ṭha bera ngaitu an tam a, Moroccan defensive midfielder hi Odisha hlawhtlinna kawngah a pawimawh thei ang.

East Bengal hi...

East Bengal pawh hian Odisha ang thoin group stage-ah an chak vek. Kolkata club hian Hyderabad (3-2), Sreenidi Deccan (2-1) leh Mohun Bagan (3-1) te an hneh hnuin semifinal-ah Jamshedpur 2-0 in an hneh.

Asian Games-ah India an tla tawh a, Lalchungnunga leh Naorem Mahesh Singh te chhawr theihin an awm leh tawh. Player ṭha pahnih hian Odisha a thleng leh tawh a, coach thutlukna a ni tawh. East Bengal hian Mizo rawlthar duhawm Vanlalpeka Guite pawh an kawl bawk.

Super Cup hi kum 2018 aṭanga neih ṭan kha a ni a, Bengaluru FC chu champion hmasa ber niin Goa leh Odisha te an champion tawh. Odisha hi an champion chuan vawi hnih champion hmasa ber an nih bakah champion zawn hmasa ber an ni dawn a, East Bengal tan erawh an vawi khat champion-na tur a ni thung ang.a