Man United khingpui tur Newport

Manchester United an vannei a, FA Cup fourth round-ah League Two club Newport County an hmachhawn dawn. January 28, Pathianni zan dar 10:00 hian Rodney Parade-ah an inkhel ang.

Man United-in goalkeeper Andre Onana an chhawr theih dawn loh avangin Tom Heaton emaw Altay Bayindir emaw chungah mawhphurhna an hlan a ṭul dawn. Kum 25 mi Badiyir hi bul ṭan tura ngaih ṭhup a nih laiin Wes Brown erawhin tawnhriat ngah zawk kum 37 mi Heaton an thlang zawk turah a ngai.

Feet ruk leh inches ruk zeta sang Badiyir hi Heaton aia an thlang lo a nih chuan sawizui a hlawh viau tura ngaih a ni a, Turkish keeper hian Old Trafford a pan ta pawh hi a inchhiar viau thei ang.

Chutihrualin Man United first keeper Andre Onana pawh Cameroon tan group match vawi thumah vawi khat chiah bul a ṭan a, Nigeria an hmachhawn hunah pawh bul a ṭan ang em tih a chiang lo. Erik ten Hag-a'n huaisen takin David de Gea contract a pawhsei sak duh lo a, tun dinhmunah erawh Spanish goalkeeper aia ṭha an la nei rih lo. Man United buaina hi kil tin aṭangin chinfel a ṭul dawn niin a lang.