Afcon Cup 2023 Zanin aṭangin last 16 khel dawn

Africa Cup of Nations chuan a vawr tawp a thleng chho mek a, zanin aṭangin a thiam zual 16 te an inel ṭan dawn. Zanlai dar 1:30-ah Nigeria leh Cameroon an inkhel dawn, inkhel hmuhnawm an chhawp chhuah ngei a rinawm.

Vawi thum champion tawh Nigeria hi Group A-ah pahnihna an ni a, an chungah Equatorial Guinea an awm. Rigobert Song-a enkawl Cameroon hi Group C aṭanga tlang niin, an chungah Senegal an awm thung - duhthusama ṭha chuan group match an khel lo ve ve tihna a ni.

Super Eagles (Nigeria sawina) hian striker ṭha Victor Osimhen nei mah se goal khung kawngah an hriam tawk lo. Napoli striker hian an match hmasa bera Equatorial Guinea nen an inkhelh ṭumin goal a khung, a dangah erawh a la khung leh lo.

European club liante awh rawn ni lai hian an ram tan goal a khung a pawimawh dawn, match dang anga a hriam lo a nih leh chuan Cameroon paltlang an harsatin a rinawm, qualifying lama a chet anga a che a nih ngat chuan tlang pui tham a ni thung ang.

Pathianni zanah Egypt chuan Congo DR an tum dawn a, an player ṭha Mohamed Salah erawh an la chhawr thei dawn lo. Liverpool forward hi malpui hliam vanga enkawl mek niin, an ramin final an lut a nih ngawt loh chuan Afcon 2023 a khel hman tawh lo mai thei.

Pharaohs buaina hi Salah chauh a ni lo, goalkeeper Mohamed El Shenawy pawh Cape Verde an hmachhawn ṭumin a inhliam a, midfielder Imam Ashour pawh training-na lamah a hliam vangin damdawi inah hruai a ngai hial - an ṭhat dan berin an inlan thei rih dawn lo tihna a ni.

Vawi sarih champion tawh leh record nei ṭha ni mah se, tun inelna kal laiah Egypt hian chak ni hmel an la hmu miah lo, an khingpui tur Congo hian player langsar leh sulhnu ṭha an nei hran lo, chuvangin quarterfinal lut turin Pharaohs hi an buk a la rit zawk tho.