Semifinal-ah Atletico an lut

Atletico Madrid chuan kum sarih zet an nghah hnuah Copa del Rey semifinal an lut ve leh ta. Ningani zan quarterfinal inkhelah Atletico hian Memphis Depay-a goal khat hmangin Sevilla chu 1-0 a hnehin an tlang.

Atletico bakah hian Athletic Bilbao, Mallorca leh Real Sociedad ten semifinal an lut a ni. Nizan khan semifinal inkhelh dan tur hi pawh a ni a, chanchin buatsaih laiin kan hre hman lo - semifinal hi anmahni khelmualah leh khualmualah khelh tur a ni dawn.

Hnehna an chan hnuah Atletico goalkeeper Jan Oblak chuan, "Kan beisei ang ngeiin inkhel pawh a hautak khawp mai, goal khung theihna remchang insiam pawh a harsa, kan remchang neih ang chhun kan chhawr ṭangkai erawh kan vannei hle," a ti.

Sevilla lamin hun tawp dawnah penalty an beisei. Pablo Barrios-a'n box chhungah Erik Lamela a ti tlu a, penalty tur ni pawhin a lang. Mahse, VAR hman a nih hnuah foul a awm lo tih finfiah niin penalty an pe ta lo.

Tun hnaiah Sevilla an che chhe hle, Spanish La Liga lamah Girona lakah 5-1 in an tlawm zo chauh a ni a, inelna hrang hranga an match hnuhnung 11 aṭangin vawi riat ngawt an tlawm, insiamṭhat an mamawh hle.