Rossi an vui hlanin a in an rawk

World Cup 1982-a Italy champion puitu Paolo Rossi chu Inrinni khan a vuina hun Vicenza-ah neih a ni a, tualchhung chanchin thehdarhtuten vuina hun hman lai hian a in rawk a nih thu an ziak.

Italian media-te ziah danin Rossi nupui Federica Cappelletti chuan an pa vuinaa a kal zawh hnuin Tuscany-a an inah a let a, an in rawk a nih thu hi hriain thil bo zingah hian Rossi 'sana' leh pawisa a tel.

Rossi te hi an chhung-kuain Poggio Cennina-a farm house-ah an cheng a, helai hmunah hian Italian football legend hian 'organic farming company' a kalpui a ni. Police-ten thil awm dan hi an chhui zui ang.

Kum 64 mi Rossi hi September 23, 1956 khan Prato, Italy-ah a piang a, footballer ropui hian World Cup 1982 khan an ram a champion pui bakah Golden Ball leh Golden Boot a dawng.

Juventus legend Rossi hi December 9, 2020 khan Rome-ah kum 64 mi niin a thi a, Italian football hero thih chhan hi tarlan a ni lo a, Italian media ṭhenkhat erawhin hun rei tak aṭang khan tih dam theih loh natna a neih thu an tarlang thung.

Rossi vuina hi Vicenza-ah neih a ni a, mipui sang chuang an pungkhawm. A kuang hi 1982-a a khelhpuiten an zawn a, chung zingah chuan Marco Tardelli, Giancarlo Antognoni, Antonio Cabrini leh Fulvio Collovati te an tel.

Cabrini chuan, "Ka khelhpui ṭhin ka chan a ni ringawt lo a, ka ṭhianpa leh unaupa ka chan a ni. A changin hnehna kan chang a, a changin kan chak lo a, engkim kan ti ho ṭhin. Heti maia min kalsan hi mak ka ti hle," tiin a sawi.

Italy ramah chuan kartawp inkhelah player-ten Rossi hriatreng nan armband dum an hreng a, inkhelh hmain minute khat chhung ngawi rengin an ding.