Stuttgart lakah Dortmund an mualpho Bayern Munich an chak zo bik lo

Inrinni zan Bundesliga inkhelah beisei loh leh rin lawk loh result kan hmu. Champion lai Bayern Munich chu an mikhualna ramah Union Berlin nen 1-1 in an inhnehtawk, chak lo tur anga an lan hnuah si phurh an sut hram.

Inkhel dangah champion tum ngam Borussia Dortmund chu an mikhual VfB Stuttgart lakah 5-1 ngawtin an mualpho. Dortmund hian match 11 khelh tawh chinah point 19 hmuin pangana dinhmun an luah mek.

Arsenal midfielder, loan hmanga Hertha Berlin zawmtu Matteo Guendouzi chuan German club tana a goal hmasa ber chu yard 25 a hla aṭangin mawi zetin a khung a, an mikhualna ramah Borussia M'gladbach nen 1-1 in an inhnehtawk ve thung a ni.

Alte Forsterel-a inkhelah Bayern tlar-hnung a phui tawk lo, minute lina lekah Grischa Promel chuan corner aṭanga ball lo kal a tauh lut a, season hmang ṭha tak Union lamin an goal neih an venghim rei hle.

German champion an che fuh hleithei lo, mahse mamawh hunah tak Robert Lewandowski a inlar. Poland international hian Kingsley Coman a thawhrah sengin a ball cross chu hnai takah a lo pet goal a, goal dang a lut zui tawh lo.

Tun hnaiah Bayern an che fuh hleithei lo, league match an khelh hnuhnung paliah vawi khat chauh chak ni hmel an hmu. Union Berlin lakah goal khat aia tam chhuah thei an ni, keeper Manuel Neuer-a'n ṭha takin Taiwo Awoniyi khung tur chu a dansak hram.

Hansi Flick-a naute hian an nomawi humhim tur chuan insiamṭhat an mamawh, inkhel dangah Leipzig chuan Werder Bremen 2-0 a an hneh bawk avangin Bayern leh Leipzig point hmuh a inzat a, Bavarians chungnunna chu goal difference chauh a ni.

Nizan khan Bayer Leverkusen chuan Hoffenheim an hmachhawn a, result kan hre hman lo. Leverkusen lam hian hnehna an chang a nih chuan Bayern leh Leipzig kal pelin table hmahruaitu an ni ang.

Season hmasa Bundesliga pahnihna Dortmund hi an player neih dan chhut chuan Bayern Munich el phak tura ngaih an ni. Amaherawhchu kai thar Stuttgart laka an khelh dan thlir erawh chuan nomawi beisei ngam chi an ni lo.

Minute 29-na aṭangin Stuttgart goal an khung ṭan, midfielder Emre Can-a'n Mateo Klimowicz a tih tuk vangin penalty a chawi a, a pet tura ding chhuak Silas Wamangituka chuan chiang takin a khung.

Dortmund lamin chawlhlawk hmain Giovanni Reyna hmangin an sut a, beisei an nei hman. Mahse inkhel chawhnu lamah Wamangituka, Philipp Forster, Tanguy Coulibaly leh Nicolas Gonzalez ten goal khat ṭheuh khung belh lehin Lucien Favre naute an mualpho.

Favre enkawl Dortmund hian Zenit hnehin Champions League last 16 an lut thei a, an boruak ṭha hi league-ah an chhawm thei lo. Striker Erling Braut Haaland chu hliam vangin an chhawr thei lo, an tlarhnung a phui loh bakah tlarhma a bil bawk.

Swiss manager Favre chuan, "Chhiatna lian tak a ni, ball kan hloh nasain a chhuh let lamah kan thawh lawk lo hle bawk. Stuttgart lamin an khel ṭha a, fak pawh an phu hle. Mahse kan khingpui an khel ṭha viau a nih chuan keimahni lam kan in enfiah a ngai hle tihna a ni," a ti.