Italian tlangval Jannik Sinner a champion

Jannik Sinner chuan player ṭha danglam bik a nihna a takin a lantir a, tennis inelna ngaihhlut bik Grand Slam-ah a vawi khat nan a champion. Italian tlangval hian Daniil Medvedev chu 3-6, 3-6, 6-4, 6-4, 6-3 a hnehin Australian Open 2024 nomawi a chawi.

Nimin tlai Rod Laver Arena, Melbourne Park-a inkhelah, kum 22 mi Sinner hian set hmasa pahnih a hloh hmasa. Mahse, huaisen taka tho chhuakin, darkar thum leh minute 44 hnuah hnehna a chang.

Sinner hian kumin Australian Open hi a khel ṭha takzet, semifinal-ah world number 1 Novak Djokovic a hneh thei a, a service ṭha tak chu final match tir lamah buai hret mah se, set thumna aṭanga insiamṭhain fiahna hautak a paltlang a ni.

Final hmuhnawm

Rod Laver Arena, Melbourne Park-ah Sinner-a'n service hmasa mah se point hmasa erawh Medvedev-a'n hmuin a bul ṭanna chu 0-15 a ni. Amaherawhchu, final thlenga a service vawi hnih chiah hlohtu Sinner-a'n point hmu zui ve nghalin service a hloh lo.

Service a hum ṭhat em avanga fak hlawh Sinner-a'n set khatnaah a service a hloh a, set a hloh zui bawk. Set hnihnaah pawh thil a danglam tam lo, service a hloh leh avangin a buai tlat - match dang aiin final boruak chu a danglam tih a chiang.

Set hnihnaah hian Italian tlangvalin a khingpui service chhuhsak let theihna remchang a hmu, break point te a hmu hial. Mahse, amah tihsual vangin point a hloh leh a, set khatna ang bawkin minute 49 hnuah Russian star a chungnung leh ta zawk.

Best of five hmanga chak zawk zawn a ni a, set hnih la tawh Medvedev dinhmun a ṭha - Sinner tan set hloh leh chuan inelna a tawp dawn. A tan sevice vawi khat lek pawh hloh nawn leh chi a ni tawh lo, tihsual neih a thiang tawh lo tihna a ni.

Thawhlehna chu

Set khat hloh leh se a nomawi beiseina a tawp dawn tih a hrechiang a, kum 22 mi Sinner-a'n thapui a thawh. Set thumnaah a service a hloh duh tawh lo, service hmasa in 5-4 in hma a hruai a, boruak sang tak hnuaiah Medvedev-a service chhuhsakin set a la - final boruak a nung leh ta.

Stadium chhunga Italian mipui kal khawmte thawm a ring a, player pahnih ten service vawi khat hloh pawizia an hrechiang a, tihsual an nei duh lo. Service hmasa zawktu Sinner-a'n a hloh duh tawh lo a, vawi khat chhuhsak zeuhin set a la, champion chinfel nan set ngana khelh a ngai.

Boruak a sang a, kum naupang zawk Sinner bawkin set hnuhnung berah a service hmasa leh chiah. Mahni vuak sual avanga khingpuite point pek an hreh a, tihsual ai chuan court lai deuh taka ball vuak let an thlang, ball an inpe tawn rei thei hle.

Game ruknaah Sinner-a hun a thleng a, Medvedev-a service-ah break point vawi thum neih chu a hmang ṭangkai. Italian tlangval hian set nganaah 4-2 in hma a hruai ta a, hemi hnu hian an service an la leh ve ve a, 5-3 a ni.

A tawpah Sinner hian 30-0 in hma hruai nghal mah se Medvedev-a'n tlawm mai a tum lo; 30-30 a ni leh phawt. Sinner-a'n hun harsa a patlang a, a zawna vawi hnih tidikin hnehna a chang.

Court-ah Sinner hi a mu nghal a, a thawhchhuah hnuah Medvedev a chibai. Hemi zawh hian mipui zinga a chhungte leh coach te awmnaah kalin an inkuah a, an chetzia aṭangin an hlawhtlinna chan ropuizia an hrechiang tih a hmuh theih.

Sinner hi Nicola Pietrangeli (French Open 1959 &1960) leh Adriano Panatta (French Open 1976) te hnua Italian player Grand Slam-a champion leh thei hmasa ber a ni.