Nomawi humhimtu Sabalenka

Aryna Sabalenka hming chu Daphne Akhurst Memorial Cup-ah ziah nawn a ni, Australian Open champion te hming an ziahna hmuna ziah ni leh turin Sabalenka hian Grand Slam nomawi a kawl lai chu a humhim.

Australian Open 2024 hmeichhe singles final hi Inrinni tlai khan khelh niin, champion lai Sabalenka hian Zheng Qinwen chu darkar khat leh minute 16 chhung lekin 6-3, 6-2 a hnehin a kum zawnin a champion.

Inelna neihna ram Australia-ah chuan nipui lum vanglai a ni. Rod Laver Arena, Melbourne Park-ah khua a lum ṭhin em avangin European player-ten inkhelh harsa an ti ṭhin - Inrinni final khelh lai erawhin boruak a lum lutuk lo thung.

World number 2 hian a service ṭha a chhawr ṭangkai em em a, a service hmasa aṭanga point hmuh theih zinga 84% a hmu hial. A khingpuiin break point vawi li a hmuh ve pawh a chhuhsak let thei vek, a tir aṭanga a tawp thlengin inkhel a thunun hneh hle.

Australian Open bikah hian Victoria Azarenka chuan kum 2012 leh 2013 khan a zawnin nomawi a lo chawi tawh, ani hnuah chuan Sabalenka hi a zawna champion leh thei hmasa a ni - Belarus nula pahnih ten sulhnu ṭha an inhlanchhawng tihna a ni.

Kum 25 mi Sabalenka chuan, "Ka tan chuan chawlhkar duhawm leh hriatreng tawh tur a ni ang, nomawi hlu bik ka humhim thei hi ka lawm takzet. Tun tournament ang taka ka khelh ṭhat hi a tam lo," tiin a sawi.

Australian Open 2024-ah Sabalenka hian champion turin player pasarih a hneh a, inkhel pasarihah hian set a hloh miah lo! Set a hloh loh mai bakah hian Coco Gauff-i nen semifinal-a tie break vawi khat an khelh bak chu tie break dang khelh pawh a ngai lo hial.

Sabalenka hi player ṭha tak ni mah se tun hma chuan ṭhat tawk lohna lai a nei ṭhin, a service a ṭhat tawk loh bakah double fault neih a ching. Rilru lam doctor a rawn hial a, chumi hnuah riru paukhauh zawk nen inelna hmachhawn theiin player ṭha bikah a inchher chhuak.

Season hmasa khan Australian Open nomawi a chawi bakah French Open, Wimbledon leh US Open-ah semifinal a lut phak vek. A kum ngaihtuahin vanglai hmang chho mek a ni a, number 1 Iga Swiatek nen inelna hmuhnawm an chhawp chhuak chho zel dawn tih a chiang.

Chak lo Zheng-i tan erawh Grand Slam final vawi khat khelhna a ni a, atan thil a awlsam lo. Chinese mi tam takin stadium chhungah an ṭawiawm a, an thawm pawh a ring thei hle - mahse kum 21 mi tan Sabalenka chu a la ṭha mah mah a ni.

Zheng chuan, "Grand Slam final hmasa ber a nih avangin ka zam deuh a, ka khel ṭha tawk lo. Tun aia ṭha zawk khan khel thei tur niah chuan ka inngai, tunah chak lo mah ila thil tam tak ka zir chhuak thar a ni," tiin a sawi.

Australian Open 2014 khan Li Na-i chu a lo champion tawh, kum 11 a liam hnuah Chinese mipui ten an ram mi champion lai hmuh leh ngei tum mah se an hmu thei ta rih lo. Zheng-i theihna en erawh chuan grand slam final dang a lut leh a nih pawhin a mak lo ang.