Kum 43 mi Bopanna-a'n Grand Slam title a la ta

Rohan Bopanna-a'n ṭum 61 zet Grand Slam inelna a hmachhawn a, kawppui hrang 19 zet a neih hnuah Grand Slam doubles title a hlawh chhuak ta.

Bopanna hi kum 43 mi a ni tawh a, Matthew Ebden nen inkawpin Inrinni khan Italian duo Simone Bolelli leh Andrea Vavassori chu 7-6 (7-0), 7-5 in an hneh.

Indian tennis star Bopanna chuan, "Ka dam chhunga tennis ka khelh ṭhat ber a ni a, ka tennis hun tawna ropui ber a ni," tiin a sawi.

Bopanna hi feet ruk leh inches lia sang a ni a; March 4, 1980 khan Bangalore, Karnataka-ah a piang. 2006 Australian Open-ah khan singles inelnaah a tel tawh a, second round a paltlang. Hetah hian kum 26 mi a ni tawh.

Indian tennis star dangte ang thoin Bopanna pawh hi khawvel huapa singles inelnaa hmachhawn tur chuan a ṭha tawk lo a, chutihrualin doubles-ah erawh khawvela ṭha ber zinga mi a ni.

Bopanna hian US Open-ah ṭum hnih (2010, 2023) final a lut tawh a, Wimbledon-ah semifinal ṭum thum (2013, 2015, 2023) lut tawhin French Open-ah pawh kum 2022 khan semifinal-ah a vanduai.

Kuminah erawh Bopanna hun a inher chhuak a; nikuma Matthew Ebden nen an inkawp aṭang khan result an nei ṭha hrim hrim bawk. Ebden chuan, "A rilru a la naupang a, court chhungah a huaisen bawk," tiin a fak.

Bopanna hi kum 43 leh ni 329 mi a ni a, Grand Slam doubles title la thei upa ber a ni. Tun ṭum hi Australian Open mipa doubles vawi 17 a hmachhawnna a ni a, a kawppui ṭhin Leander Paes nen an hmachhawn zat a inang.

An champion zawhah Bopanna chuan, "Ka chak ngai loh avangin chawlh tum lai ka nei a, thla nga chhung chak ka nei lo. Dinhmun chhe taka ding chungin inkhelh ka chawlhsan tura ka ngai hman. Ka beidawn duh lohna avangin tun hun hi ka thleng a, kawppui ṭha tak ka hmu bawk," tiin a sawi.

Doubles champion avang hian Bopanna leh Ebden ten Australian dollar 730,000 an dawng a, a inzat ve vein an insem ang. Bopanna chan tur Australian dollar 377,700 hi India pawisa chuan nuai 206 vel a ni.