Season tawpah Xavi a chhuak dawn

Barcelona manager Xavi chuan season tawpah Catalan club enkawl hna a chawlhsan tur thu a sawi. Barcelona leh Spain midfielder hlui Xavi hian November 2021 khan Qatari club Al Sadd chhuahsanin a club hlui a enkawl a, season liam ta khan La Liga nomawia chawipui.

Xavi hian season tluana Barcelona a enkawl hmasak ber ṭumah La Liga nomawi chawi mah se Inrinni zan khan Villarreal lakah 5-3 in an chak lo a, hmahruaitu Real Madrid point 10-in an pha tawh lo.

Nou Camp-a inkhelah Gerard Moreno (41') leh Ilias Akhomach (54') te goal hmangin Villarreal-in hma an hruai a, Barcelona-in Ilkay Gundogan (60') leh Pedri (68') te goal khung hmangin siphurh an sut a; minute 71-naah Eric Bailly-a'n lamah tilutin Catalan club hian 3-2 in hma an hruai.

Mahse, Yellow Submarine hian minute 84-naah Goncalo Guedes hmangin siphurh an sut a, injury time-ah Alexander Sorloth leh Jose Luis Morales ten injury time-ah mikhual team tan chakna goal an khung.

Villarreal hian injury time-a goal hnih an khung avangin an vannei a tih theih a, chutihrualin 0-0 a nih laiin an goal khung chu offside vangin pawmsak an ni lo. Inkhelh banah Xavi chuan, "Club tana ka theihna zawng zawng hlantu ka ni a, thil dang zawng aiin club ka ngai pawimawh. Fan-te lawmna turin theihtawp ka chhuah chhunzawm zel ang," tiin season tluana theihtawp a chhuah tur thu a sawi.

A chawlh tur thu sawi zuiin Xavi chuan, "Club-in thlak danglam a mamawh a, player tan pawh a ṭha ang. Tunah chuan pressure kan ngah lutuk a, hahdam zawkin kan khel thei ang. Board of director tan pawh thutlukna siam buai ngai lo a, ka chawlh mai hi a ṭha. Thutlukna dik ka siamah ka ngai," tiin season tawpa a chawlh tur thu a sawi.

Xavi hian club dang an enkawl zui ang em tih chu hunin a hril dawn a, Barcelona hmangaihtu a nih rualin kum 44 mi chauh a la ni tih hriat a ṭha. Club president Joan Laporta-a'n Xavi hi a duh ber a ni lo a, Pep Guardiola ang thoin kum hnih khat chu B team enkawl phawt se a duh a, club legend Xavi-a'n senior team enkawl a duh tawh thung.

Barcelona-in tun season-ah result an nei ṭha tawk lo a, Xavi-a'n season tawpa chawlh a thlang. Liverpool manager Jurgen Klopp-a'n season tawpa chawlh tur thu a sawi tawh bawk a, Europe club lian pahnihin season thar atan manager an zawng dawn.