A tawpah Man City an chak hram

Manchester City chuan FA Cup fifth round lut turin Tottenham Hotspur chu hun tawp dawna Nathan Ake goal hmangin 1-0 in an hneh hram. City hi FA Cup-ah champion lai an ni.

Tottenham Hotspur stadium-ah Man City-in nung takin inkhel bul an an ṭan a, Oscar Bobb hmanga an hruaina chu offside vangin pawm a ni lo. Spurs tlarhnung leh keeper Vicario an che ṭha a, City-in goal khung an harsat.

Kum 20 mi Bob hi mual vei lamah a hmuhnawm a, chance a neih bakah a ṭhiante tan a siamsak - Phil Foden leh Julian Avarez ten an khungsak thei lo. Bernaro Silva pawhin Pierre-Emile Hojbjerg tihsual chu a hmang ṭangkai thei bik lo. Hojbjerg tihsualah tho, Kevin de Bruyne-a'n hun ṭha a nei a, Belgian midfielder hian goal pawnah a pet.

Jeremy Doku pawhin Foden-a pass ṭha chu goal-ah a chantir thei lo a, a tawpah defender Ake a rawn inlar. Minute 88-naah De Bruyne corner pet chu Vicario-a'n nam chhuak na tawk loin Ake hian hnai tak aṭangin a tlawh lut.

Man City-in 1-0 in hnehna an chang a, Spurs erawh James Maddison rawn kirin danglamna a thlen lo. Defender Micky van de Ven a khel ṭha a, keeper Vicario pawh che ṭha viau mah se a tawpa a tihsual a pawi ta thung. Ange Postecoglou leh a hote, FA Cup aṭanga an tlak avangin Premier League-ah an insawrbing thei tawh ang.