Hrileng tih buai Newcastle an chak

Coronavirus vanga an inkhel tur an sawnsak hnuah Newcastle United an inlan ve leh thei ta. Inrinni zan khan Steve Bruce-a naute hian an mikhual West Brom 2-1 a hnehin point thum an hlawh chhuak.

Newcastle tan Miguel Almiron chuan inkhel ṭan aṭanga minute khatna lekah goal hmahruai a khung, mikhual lamin second half-ah Darnell Furlong hmangin sut ve mah se bench aṭanga rawn lut Dwight Gayle-a'n hun tawp hma deuhin chakna goal a khung.

Bruce-a enkawl Mag-pies player pathumin hrileng an kai a, an training ground chu kar khat chhung khar a ngai hial. Kar hmasa khan Aston Villa nena Premier League an khelh tur chu sawn a ngai hial a, tunah erawh an player-te an dam tawh.

Hri kai zinga mi Isaac Hayden chu inkhel bul ṭantu zingah a tel leh thei tawh a, midang pahnih Javier Manquillo leh Federico Fernandez te erawh an la inkhel ve rih lo thung.

Magpies manager Bruce chuan, "Coronavirus khan min ti buai takzet, chutih rualin kan inkhel ve leh thei ta hi a lawmawm. Isaac kha ni 10 chhung a inenkawl a, chumi hnuah beisei aia hmain a rawn khel leh thei hlauh.

"Tun ṭuma point thum kan hmuh hi player-te thawh chhuah liau liau a ni, chutih rualin medical department lam hmalakna leh an hnathawh pawh sawi hmaih theih a ni lo ang, kan zavaiin kan ṭangrual vek," tiin a sawi.

Chak lo West Brom erawh an talbuai chhun-zawm. Baggies hian match 12 an khelh aṭangin point ruk chauh an la hmuh, tla thei dinhmunah an ding - anni ai che chhia awmchhun chu point khat chauh la nei Sheffield United an ni.

Baggies manager Slaven Bilic chuan, "Inkhel kha ngun taka kan thlir a nih chuan point hmuh kan phu ve hlein ka hria. Ka naute hian theihna an nei sang a, ṭha takin an khel ṭhin tih pawh ka hria, mahse a pawimawh ber point kan hmu thei lo hi a mak.

"Hamrik hnuhnung ber a rik hma chuan inkhel a la tawp lo a ni tih kan zir thar a ngai, Newcastle lakah pawh hun tawp hma minute riat chauh awm tawhah goal kan chhuah, fimkhur deuh ni ila point hmu tur kan ni," a ti.