Afcon Cup 2023 Quarterfinal-ah Nigeria leh Angola

Goal khung harsat ṭhin Nigeria tan Ademola Lookman chu mamawh chhanna a ni a, hun pawimawhah Atalanta forward hian goal hnih khungin an ram chu Cameroon lakah 2-0 in a chakpui - 2023 Africa Cup of Nations quarterfinal an lut.

Afcon last 16 inkhel dangah Angola leh Namibia te intawng boruak a sang a, ram pahnih player hnawhchhuah ve ve an ni. Player kim lo hmasa Angola chuan 3-0 a hnehna changin a thiam zual pariat zingah an inhlangkai ve bawk.

Nigeria leh Angola te hi quarterfinal-ah an intawng zui dawn. February 2, Zirtawpni zanah semifinal luh inchuhin mipui 45,000 lenna Felix Houphouet Boigny Stadium-ah an inhmachhawn ang.

Mamawh chhanna

Victor Osimhen an neih avangin Nigeria hi tlarhma lamah chuan ngaihtuah awm lo tura ngaih an ni. Mahse, Afcon khelh laiah goal khung an harsat tlat - last 16 khelh dawnah pawh mi tam takin an buai mai an ring.

Mahse, Napoli striker Osimhen hian amah vengtu player a bum hnuah Lookman tan ball duhthusama ṭha a pe a, kum bithliah lama England tana khel tawh Lookman hian a hun ṭha a hlah lo, goal hmahruai a lo khung a ni.

Hun tawp dawnah Lookman bawk kan hmu nawn, khelmual sir lam aṭanga Calvin Bassey-a cross chu Lookman bawkin a lo khung a, goalkeeper Andre Onana aia thlan zawk Fabrice Ondoa tan dan theih a ni lo.

Nigeria coach Jose Peseiro chuan, "Victor Osimhen chungchang zawhna ka dawng hnem ṭhin, thil mak pawh a ni hran lo. Goal a khung loh avangin sawisel a hlawh tih ka hria, mahse goal hmasa kan khung theih nana a hnathawh te kha a ṭha hle.

"Player pakhat chauh tan inkhelah team chak pui ngawt theih a ni lo. Player zawng zawngin an hna ṭha taka an thawh a ngai ṭhin, ka nauten an khelh ṭhat vek avanga chak kan ni," tiin player mala an innghah loh thu a sawi.

Angola an tlang

Minute 17-naah Angola goalkeeper Neblu chu hnawhchhuah a ni a, midfielder Estrela la chhuakin substitute goalkeeper Antonio Signori an dah luh a ngai. Player tlem zawk ni mah se Gelson Dala hmangin minute 38-naah goal an nei hmasa tho.

Namibia chu a kim zawk ni mah se khelmual chhungah an buai zawk. Minute 40-naah defender Lubeni Haukongo chu yellow card pahnihna hmuh vanga hnawhchhuah niin, an kim loh aṭanga minute hnih lekah Dala bawkin a khung belh a, second half-ah Mabululu tan Dala hian a siamsak bawk.

Afcon 2023 khelh laiah Gelson Dala hi player langsar leh thawhhlawk berte zinga mi a ni mek. Qatari club Al-Wakrah SC forward hian goal li a khung tawh bakah a ṭhiante khung tur vawi thum a siamsak tawh vawk - Angola innghahna a ni.

Angola hian group D hmahruaitu ni chungin last 16 hi an lut, tun hmain quarterfinal vawi hnih chu lo khel ve tawh mah se khatih hunlai khan team 16 chauh an tel ṭhin, team tel an tam hnuah tun ṭum hi knockout stage an luhna hmasa ber a ni hial.

Chak lo Namibia hian Afcon knock out stage an khelh vawi khatna a ni a, dinhmun ṭha taka din theihna remchang pawh an nei hmasa. Mahse, hun pawimawhah an tawnhriat neih tlem an tuar a, player an neih ṭhat tawk loh bawk avangin an zinkawng a tawp.