Bayern leh Leverkusen an inhnaih ta

An inkarah point nga lai te a awm hman a, nomawi lama vanduai thei tak Harry Kane-a'n a vanduaina chu Bayern Munich lamah a chhawm dawn nia sawi te pawh a awm hman, tunah erawh Bayern leh Bayer Leverkusen inthlauhna chu point hnih chauh a ni leh ta.

Inrinni zan Bundesliga inkhelah champion lai Bayern lamin Aleksandar Pavlovic leh Alphonso Davies te goal hmangin hma an hruai nuamsa. Ermedin Demirovic-a'n goal khat sut ṭhen mah se Kane-a'n Bavarians chu dinhmun ṭhaah a dah nawn.

Bayern goalkeeper Manuel Neuer-a'n Sven Michel-a penalty dansak mah se, hun tawp dawna Demirovic-a penalty erawh a dansak thei ta bik lo. Allianz Arena-ah Bayern 3-2 in an chak.

Thomas Tuchel-a'n hliam vangin player pakua ngawt chhawr theih loh a nei, an zingah player ṭha Konrad Laimer, Joshua Kimmich leh Dayot Upamecano te pawh an tel a, loan hmanga an hawh Eric Dier-a'n German club tana a match hmasa ber a khel thung.

Bayern buaina belhchhah turin Kingsley Coman chu chawlhlawk hmain hliam vanga lak chhuah a ngai. France international hi a khup vei lam a hliam a, eng chena rei nge a chawlh a ngaih dawn tih erawh sawi theih a la ni lo.

Bayern sporting director Christoph Freund chuan, "Buaina kan hmachhawn mek, a paltlang dan erawh kan hre thei ang. Kingsley inhliam pawi kan ti a, hun rei lote hnuah tun hma aia ṭha zawka lo kir leh turin kan duhsak," a ti.

Inkhel dangah Xabi Alonso enkawl Bayer Leverkusen chu Borussia Monchengladbach nen goal awm loin 0-0 in an inhnehtawk. Chak zo lo mah se an tlawm lo a, league match 19 an khelh tawh china tlawm loa kaltluang thei awmchhun an ni hial - an hmahruaina erawh vawi khat chetsuala hloh thei an ni tawh.

Stuttgart chuan RB Leipzig 5-2 in an lo hneh ve thung. Champions League last 16-a Real Madrid hmachhawn tur Leipzig hi Bundesliga an match hnuhnung pathumah an tlawm ta, insiamṭhat an mamawh hle.