Juventus leh Milan chak zo lo

Serie A champion tum Juventus leh an hnuaia awm AC Milan te chuan point hnih an hloh ve ve. Juve hi Empoli nen 1-1 in an inhnehtawk a, Milan pawh hun tawp dawna goal an chhuah avangin Bologna nen 2-2 in an inhnehtawk ve bawk.

Old Lady hian league match 22 aṭanga point 53 hmuin hma an la hruai tho - Inter Milan aiin point hnihin an hmu hnem zawk. Amaherawhchu, Turin club hian match hnihin an khel tam zawk, nizan inkhelah Inter an chak a nih chuan hmahruaitu an inthlak ang.

Tun laia khel ṭha thei tak Dusan Vlahovic hmangin goal nei hmasa mah se Juve hian an hum thei lo. Hun tawp dawn lamah mikhual Empoli lamin Tommaso Baldanzi hmangin an sut a, goal dang lut zui loin point khatah an lungawi a ngai.

Juventus manager Massimiliano Allegri chuan, "Minute 18-na lekah Arkadiusz Milik hnawhchhuah a ni a, player kim loa kan khel chungin goal kan nei hmasa zawk. Kan hun ṭha neih ang kha chhawr ṭangkai zel thei ni ila chuan goal dang pawh khung thei tur kan niin a lang.

"Mahse, goal hmaah kan vannei tawk lo. Empoli kha Monza hneh hlim niin an inringtawk hle a, kan ruahmanna te kha a lo do let dan tur an hre tlat, duhthusam vek ni lo mah se result chhia a ni lo," tiin a sawi.

Inrinni zan inkhel dangah AC Milan lamin goal an chhuah hmasa. Mikhual Bologna lamin Joshua Zirkee hmanga an hma hruaina chu Ruben Loftus-Cheek hmanga an sut bakah an khung belh a, mahse hun tawp dawnah Bologna tan Riccardo Orsolini-a'n penalty khungin an inhnehtawk.

Milan hian stadium chhungah an goalkeeper Mike Maignan an thlawpna an lantir. An match hmasa lama Udinese 3-2 a an hneh ṭumin Maignan hi auh nawmnah niin khelmual a chhuahsan hial a, minute 10 hnuah an inkhel chhunzawm leh thei chauh.

Tun ṭumah hian Milan chuan Maignan an thlawp zia lantir nan thuziak an tarlang, "Thimna chu thimna hmanga tih en theih a ni lo, eng chauhin a ti eng thei," an ti. Maignan au nawmnahtu hi Udinese chuan a dam chhunga an club inkhel en thei lo turin an lo hrem tawh a ni.