Warriors hnehtu Lakers

LeBron James awmna Los Angeles Lakers chuan nimin zing khan Golden State Warriors 145-144 in an hneh a, over time khelh zawh hnuah point khat leka sang zawkin hnehna hlu tak an chang.

James hi kum 39 mi a ni tawh a, basketball inelna ngaihhlut NBA khel laia player upa ber a ni. Warriors lakah Lakers hian triple-double (36 points, 20 rebounds leh 12 assists) a nei a, hun tawp dawna free throw a luh chu an chakna a ni.

Golden State lam chak lo mah se an player ṭha bik Stephen Curry erawh mimalin a khel ṭha leh hle. Curry-a'n point 46 a nei a, assist vawi sarih a nei bawk - Jonathan Kuminga (22 points), Andrew Wiggins (22) leh Klay Thompson (24) te khel ṭha ve bawk mah se chak nan a tawk zo chuang lo.

Inkhel dangah Denver Nuggets pawh an chak, NBA champion lai hian an player ṭha centre Joel Embiid chhawr thei lo Philadelphia 76ers chu 111-105 in an hneh a ni.

76ers hian an match hmasa zawkah San Antonio Spurs 133-123 in an hneh, he inkhelah hian Joel Embiid-a'n point 70 lai a nei. NBA player zingah match khata point 70 nei tling thei mi 10 zingah a hming a chhu kai.

Nuggets lakah MVP nilai Embiid hi inlan chhunzawm tura ngaih a ni a, inbuatsaihna pawh a nei. Mahse, inkhelh hma taksa an tih lum (warm-up) laiin a hliam a, damdawi thiamte thurawn angin a inkhel ta lo.