Chawlh mai ka la tum lo - Ibrahimovic

Zlatan Ibrahimovic chuan a kum tam deuh tawh mah se inkhelh chawlhsan mai tumna a nei lo tih a sawi a, hlawhtlinna dang chan chelh châkin a la tuihal reng tih a sawi tel bawk.

Kum 39 mi Ibra hian Serie A season kal laiah match riat a khelh aṭangin goal 10 a khung leh der tawh, player ropui Cristiano Ronaldo leh Romelu Lukaku te pawhin an chung en a ngai rih a ni.

Sweden international hlui hian ram hrang hranga league lian pasarihah ngawt inelna a hmachhawn tawh a, a kalna apiangah chanchin ngaihnawm leh sulhnu ṭha a hnutchhiah deuh zel - AC Milan pawh league hmahruaitu a nihpui mek.

Ibra chuan, "Ka theih chen chen inkhelh ka duh, ka tih theih chin chu ka taksa ṭha taka enkawl a ni, a hnu lam chu thil thlengin a hril ve tawh ang," a ti. Swede striker hian 'Uain ṭha mi' ang mai a nih thu a lo sawi tawh ṭhin bawk.

Milan changchang sawi zuiin Ibrahimovic chuan, "Milan ka zawm hmasak kha chuan champion tura inel zingah kan tel a, a hnuhnung zawkah erawh team insiamṭhat tum mek an nih laiin ka zawm thung, a boruak chu in ang lo tak a ni.

"Mahse miin thil theih loh leh harsat tak a nih thu an sawi chiah hian kei chu ka phur ṭhin. Tunah chuan Milan pawh kan indin thar leh mek a, ṭha taka hna kan thawh miau avangin league hmahruaitu pawh kan ni thei," a ti.

Manchester United tana a khelh lai 2017 khan Ibra hi a khup a hliam a, a hliam hi a dam mai theih loh avangin inkhelh chawnsan a lo tum hman tawh. Mahse chawl mai loin a inkhelh theih hun a nghak chhuak leh ta zawk a, a theihna sang tak a la pholang zel.

Barcelona, Inter, Ajax leh Paris St-Germain tan pawha khel tawh striker palian hi tun dinhmunah chuan Covid-19 vangin a inkhel thei lo mek. Serie A match hnuhnung pahnih a khel thei lo tawh a, nizana Genoa an tlawh pawhin a la inlan thei lo a ni.