Leeds aia thiam zawk Hammers

Manager dangdai ve tak Marcelo Bielsa-a'n inkhelh ṭan hma niah Leeds United tana inkhel bul ṭan tur a sawi lawk vek a, an mikhual tur West Ham hlau lo viau mah se Argentine manager enkawl team hi 2-1 in an chak lo.

Zirtawpni zan Premier League inkhelah mualneitu Leeds lamin minute rukna lekah Mateusz Klich-a penalty hmangin hma an hruai a, mahse mikhual team lamin Tomas Soucek hmangin an sut hnuah Angelo Ogbonna chuan chakna goal a tauh lut.

Inkhelh banah Leeds penalty khung danin sawi zui a hlawh. Striker Patrick Bamford-a'n penalty a hlawhchhuah a, a hlawh danah sawisel tur a awm lo. A pet turin Klich a rawn ding chhuak, a ball pet chu keeper Lukasz Fabianski chuan harsa vak loin a lo dang.

Amaherawhchu, penalty pet dan hi VAR hmanga ennawn a ni. Klich-a'n ball a pet fuh hmain keeper Fabianski-a ke chuan goalline a pel hret, Arsenal keeper hlui hi kal hma lui ni loin line a rap lo palh chauh a ni.

Penalty pet nawn niin, a pet hmasak a hlahtu Klich chuan a hlah nawn lo. West Ham manager David Moyes chuan, "Thutlukna mak deuh deuh hi a siam ṭhin," tiin video assistant referee chungchang a sawisel a, chak tho mah se penalty an pet nawn danah a lawm lo.

Moyes chuan sawi zawmin, "Penalty kan chawi danah khan sawisel tur a awm lo, mahse pet nawn a nih dan kha chu a mak hle. Tuin nge Fabianski-a ke khan line a rap lo hret tih kha lo en, en lenna hmanga en a nih ngawt loh chuan hmuh tham loh hial a ni.

"Khawl hmanga endik a nih hian thutlukna ṭhenkhatah chuan football hlutna leh mawina a ti nep. Khatiangah kha chuan keeper in a dinhmun siam ṭhat nan tlema lo chet sawn kha chu a tih ve tur chu a ni," tiin a keeper Fabianski chu tihsual nei loah a ngai.

Hammers hian kum 20 chhunga a vawi khat nan Elland Road-ah hnehna an chang, tun hnai an match hnuhnung panga zingah vawi li ngawt hnehna an chan theih a vangin season bul an ṭan fuh hle.

League match 12 khelh aṭangin West Ham-in point 20 an hmu a, hmahruaitu Tottenham an phak lohna chu point li chauh a ni. Leeds erawh khel hmuhnawm viau mah se chetsual an ching a, point 14 neiin 14-naah an awm.