Madrid derby-ah Real an chungnung

Real Madrid-in beisei angin season bul ṭan lo mah se thai bo chi an la ni lo tih pholangin Madrid derby-ah hnehna an chang a, Atletico Madrid chu 2-0 in an hneh. 

Mualneitu Real tan Casemiro chuan goal hmahruai a khung a, Jan Oblak chuan an lamah a ti lut bawk - Atletico-in a chhanletna tur an nei lo.

Atletico-in tun season league match an khelhah tlawm an la nei lo a, mahse, Inrinni zan an inkhelah Real-in an thawnthu thlak sakin a vawi khat nan an tlawm ve ta. 

Real manager Zinedine Zidane chuan, "Sawiselna dengkhawng tak tak kan dawng a, mahse minti chaktu atan kan hmang. Minute khatna aṭangin kan khel ṭha nghal a, kan hnathawh ṭhat avanga lawm tur kan ni," a ti. 

Real-in tun hnaiah Champions League last 16 lut mah se rin ngam an harsa a, a bik takin an hmachhawn tur hi Atletico an nih avangin chak tur zawka Zidane-a naute rin chu thil harsa tak a ni. 

Atletico-in league match sarih chhung a zawna hnehna chang chungin derby an hmachhawn a, Real an hmachhawn hma hian league match 10-ah vawi hnih chiah goal an chhuah bawk. 

Mahse, Madrid derby-ah Real-in a tlawm zawk nih an tum lo - hamrik a rik rualin inkhel an thunun nghal a, Karim Benzema khung tur nia lang keeper ṭha mi Oblak-a'n a dante chu ṭha tak a ni. 

Minute 15-na leka Casemiro hun ṭha neih erawh Oblak hian a dang thei tawh bik lo a, first half tawp thlenga goal dang lut loin Real-in 1-0 in hma an hruai. 

Atletico boss  Diego Simeone-a'n game dang an phak lo tih a hria a, second half-ah a rualin substitution pathum a siam - centre back Felipe, midfielder Héctor Herrera leh winger Yannick Carrasco a la chhuak. 

Argentine boss hian player pathum aiah Renan Lodi, Ángel Correa leh Thomas Lemar-a luhtir a, inkhel boruak pawh a danglam nghal - mahse, Lemar hian a chance neih zui chu goal-ah a chantir thei lo. 

Lemar-a'n a hun ṭha neih a khawhral pawina a lang nghal a, minute 63-naah Atletico bawkin goal an chhuah zui - Real defender Dani Carvajal-a shot chuan post a per hnuin Atletico keeper Oblak-a per leh a, a per lehlam hi a goal!

Real-in hnehna an chan avangin Atletico an phak lohna chu match khata khel tam zawk chungin point thum chauh a ni leh ta a, Zidane-a naute tan champion sawi rik ngam a ni leh ta. 

December thlatirah kha chuan Shakhtar Donetsk laka an tlawm avangin Real chu Champions League group stage aṭanga tla thei dinhmunah an ding a, La Liga hmahruaitu an phak lohna chu point sarih a ni bawk.

 

Mahse, kar hmasa tawp lamah khan Sevilla chu 1-0 in an hneh a, Champions League last 16 lut turin Borussia Monchengladbach chu 2-0 in an hneh zui bawk - Real an nui ve leh thei ta. 

Zidane chuan, "Sevilla leh Gladbach lakah khan kawng tinrenga kan hmasawnna chu kan pholang tawh a, zanin kan result hmang hian kan nem nghet leh ta a ni," tiin a sawi. 

Atletico-in tlawm mahse La Liga-ah hma an hruai chhunzawm a, nizan inkhela Real Sociedad an chak chuan Sociedad hi hmahruaitu an ni zui dawn thung - inkhel result kan hre hman lo a, Barcelona an inlan bawk.