FC Goa-in a zawnin hnehna an chang

Indian Super League club FC Goa chuan tun season-a a vawi khat nan a zawnin hnehna an chang ve ta a, Inrinni zan khan Odisha FC chu 1-0 in an hneh. 

Goan club tan hian Igor Angulo chuan minute 45-naah inkhela goal awmchhun a khung a, Odisha-in a chhanletna tur an nei thei lo. 

Odisha tan Jerry Mawi-hmingthanga chuan si phurh sutna remchang nei mah se goal-ah a chantir thei lo a, an tlawm.

Jamshedpur FC laka tlawm hlim ATK Mohun Bagan an la insiamṭha thei lo a, Zirtawpni zan khan Hyderabad nen 1-1 in an inhnehtawk. 

Bagan tan Manvir Singh chuan minute 54-naah goal hmahruai a khung a, mahse, minute 65-naah a tih ṭhat thai chhiain penalty a chawi zui.

Hyderabad tan Joao Victor  chuan penalty hi goal-ah a chantir a, hun tawp thlenga goal dang lut tawh loin 1-1 in an ṭin. 

Minute 76-naah Lal-awmpuia chu Hyderabad tan tlan luhtir a ni a, ISL-a a match hmasa ber kheltu Ramhlun South forward hian danglamna erawh a thlen hman lo. 

Zaninah ISL inkhel pakhat a awm dawn a, Hmingthanmawia (Valpuia) khelhna Mumbai City chuan Jamshedpur FC an hmachhawn ang. 

Jamshedpur-ah hian Laldinliana Renthlei, Ricky Lallawmawma, Isaac Vanmalsawma leh William Lalnunfela ten hmun pawimawh an chang vek a, Dinliana hi hrem vangin a inlan thei lo ang.