David-a'n silver medal a chawi chhuak

Khelo India Youth Games-a weightlifting inelnaah David Zohmingmawia chuan 102 kg-ah silver medal a chawi chhuak. Lawipu Veng tlangval David hi coach Malsawma Khiangte kaihhruaina hnuaia Khelo India State Centre of Excellence, Aizawla inzir a ni.

Mizo coach Malsawma Khiangte thawhrimna zarah weightlifting-ah Mizoramin nasa takin hma a sawn. Tun ṭumah pawh hian medal chawi chhuak ngei tura ngaih Bungzung tlangval Lalruatfela chu inhliam vangin a tel thei lo a, tel thei ngat se weightlifting tan medal pahnih lak theihna kawng a inhawng zau hle.

102 kg-ah hian gold medal latu Suvansh Thakur-a'n snatch (125) leh clean & jerk (155) a chawi belh khawm chu 280 kg a ni a, David-a chawi belhkhawm hi 266 kg niin silver medal lak nan a tawk.

David hian snatch-ah 113 a chawi a, hetah hian Thakur nen an inthlau deuh a, chutihrualin clean & jerk-ah erawh pakhatna hi 2 kg chauhin a pha lo. Hriat tel atana ṭha erawh 102 kg-ah David-a hi a naupang fal a, pakhatna ai hian kum thumin a naupan zawk avangin hmabak a la nei êng hle.

Weightlifting-ah David Lalzawmdika a vanduai a, 96 kg-ah palina niin medal a la pha lo chiah chiah. Isak Malsawmtluanga (61 kg) leh Cindy Lalparmawii (76 kg) te erawh 10-na an ni ve ve.

Tun ṭum Khelo India Games-ah hian Mizoramin infiammi 47 tir tur an ni a, inhliam vangin medal beiseiawm pahnih Lalruatfela (weightlifting) leh H. Lalṭhazuala (badminton) te chu an tel thei lo.

David Zohmingmawia'n silver medal a chawi chhuah bakah boxing-ah Chuhvel tleirawl Rebecca Lalfakawmi'n bronze medal a hnek chhuak a, Mizoram hi medal pahnihah an lungawi a ṭul.

Mizoram hi boxing leh weightlifting bakah judo, hockey, basketball, table tennis leh wrestling inelnaah te an tel a ni.