Plate group semifinal-ah Mizoram

Board of Control for Cricket in India (BCCI) hnuaia state hrang hrang inelna Ranji Trophy 2024 khelh laiah, plate group bikah Mizoram chuan match khelh hmabak nei chungin semifinal an lut tih a chiang tawh.

Mizoram hian Thawhṭanni tlai khan Meghalaya chu run 191-in an hneh a, semifinal atan hian an dinhmun an tichiang. Cricket Association of Mizoram (CAM) team-ten mipa senior huangah a vawi khat nan semifinal an lut tihna a ni a, an khingpui tur erawh group match khelh zawh hunah a chiang ang.

February 9-12 chhungin Mizoram hian an group match hnuhnung ber atan Hyderabad an tum leh dawn a. CAM chuan inelna neih laiah Mizo tlangval ten hming an chher avang leh, an dai ngai loh ram an dai tak avangin lawmthu an sawi.

Meghalaya nen hian January 26-29 chhung khan an intawng. Ṭhum vawra vannei zawk Mizoram lamin vuak (bat) hmasak an thlang a, thawh khatna (1st innings) ah run 359 siamin an out vek. Lalhruaizela'n 57 a siam. Tualchhung player dang Vikash Kumar (67) a che ṭha bawk.

1st innings-ah Meghalaya hian run 281 siamin an out vek a, Mizoramin thawhkhatna-ah run 78-in hma an hruai.

Thawhhnihna (2nd innings) ah Mizoramin bat lehin run 237 siamin mi 9 an out a (237/9), hei hi an duhtawk (declare) a ni. 2nd innings-ah Dawrpui Vengthar tlangval Jehu Anderson chuan half century run 51 a siam.

Target umin Meghalaya hian run 124 chiah siamin an out vek. Ramhlun Venglai tlangval Joseph Lalthankhuma chuan wicket thum lain a che ṭha hle.

CAM Cricketer of the Year ni lai Joseph Thankhuma chuan, "Mizoram team boruak a ṭha, kan inlungrualin kan inkawmngeih tlang hle bawk. Semifinal-a kan khingpui awm thei Sikkim emaw Meghalaya emaw an ni a, min hneh let an châk khawp ang.

"Mahse, Mizoram pawhin theihtawp kan chhuah dawn a, dinhmun sang zawk kan thlen theihna tur remchang hi bawhpelh loh hram kan tum. Mizo mipuiten min ṭawngṭaipui ṭhin a, tun ṭumah pawh hian an dil puina kan ngen," tiin Vanglaini a hrilh.