Liverpool khelmualah indinthar beisei Chelsea

Zanin dar 1:45-ah Premier League match hmuhnawm en tur a awm dawn a, Liverpool chuan Chelsea an mikhual dawn - team pahnih hi tun dinhmunah inthlau viau mah se, club lian ve ve an nih miau avangin an boruak a 'hot' lo thei lo.

February 25 zanah team pahnih hi League Cup final-ah an inkhel dawn a, boruak a inmung lian tawh hle. He final pawh hi a tirah chuan zan dar 10:00-a khelh tura tih ni mah se, zan dar 8:30-ah sawn hma a ni.

A chhan maw? Police lamin team pahnih inkhel tur hi a boruak a sang dawn lutuk, tiin, tlai tawh lama inkhelh chu a buaithlak theiin an ring a, sawn hma turin an ngen - Police lam thurawn angin sawn hma a ni ta.

Hei hian chiang taka a tarlan chu team pahnih inkar boruak a ni a, zanin match hian thui taka League Cup final tur a hril lawk dawn bawk avangin club pahnih tan tlawm a thiang lo.

I liam dawn maw

Jurgen Klopp-a'n rin loh takin season tawpa Liverpool a chhuahsan tur thu a sawi thut a, mak tih a hlawh - Premier League-ah hmahruaitu an ni a, League Cup-ah final an lut tawh a, FA Cup-ah champion an la beisei a, Europa League last 16 an lut tawh bawk.

Hei mai a ni lo. Klopp hian Liverpool team dinthar leh tumin theihtawp a chhuah a, tuna Liverpool hi "Liverpool 2.0" tih hiala hming lem phuahin, Anfield-a pan hnua an vanglai ang tak tak chu neih let pui leh a tum a, an hlawhtling mek tih hmutute chu nang leh kei kan ni.

Mahse, hetihlai tak hian Klopp-a'n a chhuah tur thu a sawi thut a, Liverpool fans an inring hman lo a, football khawvelin mak a ti - "Champions League-a kaihhruai leh phawt a duh lo em ni?" tih zawhna hial pawh a piang a, mahse, patlingin thutlukna a siam tawh.

Klopp-a'n a chhuah tur thu a sawi hnua an match hmasa berah Liverpool-in 5-2 in Norwich City chu FA Cup fourth round-ah an sawp zui. An coach chhuak tur hi player leh fan ten ropui taka thlah an duh tih a chiang a, league-a an hmahruaina chhawm nung zel turin zaninah chak ngei an tum dawn.

Chak a hun

Tun season-a team pahnih intawn hmasakah 1-1 in an inhnehtawk a, Stamford Bridge-a inkhelah hian Luis Diaz-a goal khung chu Axel Disasi-a'n a sut. Zaninah chuan Anfield-ah an inkhel dawn a, Liverpool-in point khata lungawi an tum lo ang.

Klopp-a tana lawmawm lai chu an thiampuipa Mohamed Salah an chhawr theih loh chhunga tlawm an nei chuang miah lo hi a ni a, zaninah pawh Egyptian forward hi la chhawr thei dawn lo mah se Reds tan buaina tur a awm lo.

Tlarhmaah Diogo Jota, Darwin Nunez, Cody Gakpo leh Diaz te an 'form' vek a, Norwich lakah midfielder Alexis Mac Allister chu squad-ah pawh awm loin chawlh hahdamtir a ni a, Virgil van Dijk pawhin bench aṭangin bul a ṭan.

Liverpool tana lawmawm lai chu hliam vanga an chawlh reng hnua Trent Alexander-Arnold, Andy Robertson leh Dominik Szoboszlai an lo kir leh ta hi a ni a, Norwich lakah bench aṭanga luhtir an ni - a tawi zawnga sawi chuan Reds hian an boruak fuh vanglai takin Chelsea an mikhual dawn.

Beiseina

Chelsea fan-te tan tun season zet chu "Beiseina" tih deuh reng a ngai a, a dawhthei fal lo tan chuan an buaithlak hman hial. Mahse, he team hi tun hnaiah an insiamṭha tih a lang a, chumi tifiahtu chu League Cup final an khel tur hi a ni.

Blues hian inelna hrang hranga an match hnuhnung pasarihah vawi khat chiah tlawm an nei a, an tlawm chhun hi League Cup semifinal first leg-a 1-0 a Middlesbrough an ngam loh kha a ni a, second leg-ah 6-1 in Boro hi an sawp zui.

Chelsea tan Liverpool hneh hi inrintawkna neih thar nan a pawimawh a, Reds hneh hi a ṭulin a ṭul, tih hialin a sawi theih ang. Hliam vanga a chawlh reng hnuah September hnua PL match-a a vawi khat nana bul ṭan turin Ben Chilwell a inpeih leh tawha ngaih a ni a, tlarhnung bakah goal nawr kawngah a ṭangkai ang.

Tun season-a goal 13 leh assist vawi sarih nei tawh Cole Palmer chu Liverpool tan ven uluk ngai tur a ni dawn a, Raheem Sterling pawhin a khelmual hman thiam hluiah a hming chher nawn a tum dawn - zanin chu i meng rei phawt mai ang aw!