Palinaah Sinner a awm

Australian Open an khel zo a, mipa tennis thuneitu sang Association of Tennis Professionals (ATP) pawhin kalphung pangngai angin world ranking an ti chhuak thar - Grand Slam champion hlim Jannik Sinner chu palinaah a awm.

Italian tlangval hian Daniil Medvedev hnehin a vawi khat nan major title a la, a champion avangin point 1820 a hmuh belh - Grand Slam champion tan point 2000 hmuh theih a ni a, inelna hnuhnungah an inlan a nih chuan an ranking point neihsa an hum tel a ngai ṭhin thung.

Australian Open nomawi a hum theih loh avangin Novak Djokovic chuan point a neihsa a paih ṭhen a, point 1200 a paih chungin Serbian star hi world number 1 a la ni tho, a hnuaiah hian Carlos Alcaraz a awm thung a ni.

ATP ranking chhuak tharah hian India tlangval Rohan Bopanna chu mipui ngaihven zinga mi a ni phak. Kum 43 leh ni 331 mi ni chungin doubles number 1 a ni a, hetiang dinhmun luah thei upa ber a ni hial.

Indian mipa tennis player zingah Mahesh Bhupathi leh Leander Paes te hnung zuiin Bopanna hi number 1 ni thei pathumna a ni leh chiah bawk.