Qatar an tling, Iraq an tla

Asian Cup 2024-ah inelna thlengtu Qatar an che ṭha chhunzawm a, January 29, Thawhṭanni zan khan Palestine 2-1 a hnehin quarterfinal an lut. Qatar hian semifinal lut turin nizana Uzbekistan leh Thailand inkhela chak zawk an hmachhawn ang. Inkhel dangah group stage-a chak vek Iraq-in Jordan an hneh lo a, an tla.

Beisei nei Qatar

FIFA World Cup thlengtu Qatar-in Asian Cup an thleng leh a, an tum a inang tawh lo. Qatar hian World Cup-ah kha chuan group stage paltlang hrim hrim kha an duhthusam a ni a, point pawh hmu loin an tla. Asian Cup-ah erawh Qatar hian champion an beisei ngam a, group stage-ah pawh an chak vek.

Al Bayt Stadium, Al Khorp-ah Qatar-in Palestine an hmachhawn a, inkhel entu pawh 63,753 an ni pha daih. Knockout-ah chuan inelna kalphung a dang daih a, goal hmaah Qatar aiin Palestine an hlauhawm hret zawk a, goal pawh an khung hmasa zawk.

Minute 37-naah Oday Dabbagh-a'n Qatar defender pahnih a hmachhawn chungin goal-a petna tur khawp a insiam a, Palestine goal hmahruai a khung. Inelna thlengtu Qatar ben harhin an awm a, first half injury time-ah corner kick hmang ṭangkaiin Hassan Al-Haydos hmangin si phurh an sut.

Qatar-in second half-ah bul an ṭan ṭha lehnghal a, Almoez Ali-a'n penalty a hlawh chhuak nghal. Dead ball specialist Akram Afif rawn pen chhuakin minute 49-naah hmahruaina goal a khung. Quarterfinal thlen nan Qatar-in goal venhim a tawk tih an hria a, goal venhim hna ṭha taka thawkin goal an chhuah tawh lo.

Team ṭha Iraq an tla

Khalifa International Stadium, Al Rayyan-ah ram inṭhenawm Iraq leh Jordan an inkhel a, kum 2015 hnua an inkhelh hmasa ber a ni bawk nen, inkhel a nung hle. Iraq-in bul ṭan ṭha mah se Jordan pawhin chance ṭha an nei a, first half-ah goal hmuh tur awm lawk lo mah se inkhel a nung takzet.

First half injury time-ah Iraq defender ball pass fimkhur tawk loh chu, Yazan Al-Naimat-a'n a dang chat a, halfway line thlen hma aṭangin a khalh tlang a, goal ṭha bik a khung. Team ṭha zawk Iraq-in second half-ah si phurh sut tumin na takin an nawr a, an goal bawh pawh a na nghal.

Minute 68-naah Saad Natiq-a'n si phurh sutna goal a tauh lut a, Aymen Hussein-a'n minute 76-naah hmahruaina goal a khung. Iraq lawm chhung a rei lo, Aymen Hussein hi a chetdan a mawi loh avangin yellow card vawi hnihna a hmu a, an hnawt chhuak.

Jordan-in an tamna an hmang ṭangkai a, injury time-ah pawh minute nganaah Yazan Al-Arab hmangin si phurh an sut zo. Hetah hian an duh tawk lo, minute hnih hnuah Nizar Al-Rashdan chuan box pawn aṭangin mawi zetin goal kilah a pet lut a, chakna goal a ni.

Iraq hian kum 2007 khan Asian Cup nomawi an chawi a, hemi hnu hian Asian Cup knockout stage-ah chak an nei tawh lo. Tun ṭumah Iraq hian group stage-ah Japan meuh hneh mah se hun pawimawhah an chesual. Jordan tan erawh tun ṭum hi Asian Cup knockout stage-a an chak hmasak ber a ni.