Silly Point : Chak leh chak loh biahthu

Pawl Kut Thla 25 khan India chuan an mikhual England chu Test Series match nga an khelh tura a khuhhawn nan Rajiv Gandhi International Stadium, Hyderabad-ah an lo chhawn a nih kha.

Aw Test Cricket!

20-20, One day hmuhnawm dan chu a dang daih a, mahse cricket tui mi leh a khelh ngeia lo khel tawh tan chuan Test cricket tlukzo tur hi chu a la awm chuang lo a ni e. Ni nga chhunga zinkawng hrang hrang, pendulum inthen kual anga team intumte dinhmun inthlak zak zak te, bul tan ṭha lo tan pawn 'second chance' 2nd innings a awm te hi a ti hmuhnawm leh ngaihnawm tu a ni si.

A tawi zawngin mikhual lamin vuak hmasak an thlang a captain Ben Stokes chet ṭhat zarah 246 runs an sual chhuak. India chhanletna chu 436 runs niin Yashasvi Jaiswal (80), KL Rahul (86) leh Ravindra Jadeja (87) ten hun an hmang ṭha.

Sap pa Ollie Pope-a'n 'innings of a lifetime' khelin 196 runs a rawn thawh veleh, an 190-run deficit rulh bakah India tan target 231 runs an siam. Debutant spinner Tom Hartley-a'n wicket sarih lain, England-in mahni tualzawla Sakeibaknei India chu 28 runs-in an tlawm der mai a nih kha.

India X-Ray

Mahni home advantage spinner-te chet ṭhatna tur pitch lo buatsaih pawh hi, khandaih hriam tawn ang a ni a, tihfuh loh vaih chuan mahni leh mahni in sah theihna a ni. Ṭhumvawra vanduai India-in last innings an bat a ngai dawn a, 1st innings a namen loa runs an siam hnem a ngai tih a chiang.

Run 190-in lead mah se a tam tawk lo tih a chiang. Chutah second innings-a Ollie Pope-a reverse sweep leh scoop-in game a thunun titih a, India bowler-ten a chhana an nei lo a ni deuh ber a, a ni thum ni inkhel kha chu Ollie Pope-a show leh India ball um nileng ni a ni tawp mai ni.

Thih ngama na mek, a hringtu nu kianga hun a hman duh avanga inlan thei lo Virat Kohli a tel lo a langsar hle bawk. Rahul Dravid a leh a hote khan inenlet leh nghat se, wicket pakhat a tlâk a, a zawk deuh thawa wicket 2-3 velin a zui ṭhin kha a pawizia an hrechiang telh telh ang, kha batting line up-ah khan partnership mumal awm lo kha a awm ta nual awm e.

Ṭen ṭen

England lamin round nga bout-ah round khatnaah thisen an chhuah hmasa a, a changtupa hnar a thi ṭan kan ti dawn nge? A changtupa zawk hriat loh khawpin kum zabi 21-na British Invasion kan hmu leh dawn, i lo thlir zel ang. India innghahna, nikum lama hun rei tak inhliam KL Rahul leh Ravindra Jadeja te an inhliam nawn leh hian lu a tihai zual a, Kohli lo awm bawk silo nen; Rohit Sharma tan Mosia ianga hruaitu ropui a nih leh nih loh lantir hun a nih hmel e.

Thil thlen dan hian February 2, Zirtawpni aṭanga Vishakapatnam Test a hmuhnawm zual dawn e. A lehpekah Ranji Trophy leh Mizo tlangvalte thailan kan tum ang.