Rashford chungchangah Man United-in thuchhuah siam

Manchester United chuan Marcus Rashford chungchangah thuchhuah an siam a, England international forward hian a tihsual a pawm thu an sawi. Rashford hi kar liam ta Nilaini leh Ningani zan khan Northern Ireland-a zan lam party-na hmunah hmuh a ni.

Rashford hian training a zawm leh tawh a; February 1, Ningani zana Wolves an thlawh hunah thlan theih zingah a awm ang. Man United hian khelmual pawn lama inthunun ṭhat loh vangin Jadon Sancho chu Borussia Dortmund-ah loan-in an kaltir tawh lo a, Rashford pawh hian tun season-ah ringawt pawh ṭum khat aia tam harsatna a tawk tawh.

Carabao Cup fourth round-a Man United-in November thlaa Newcastle United an hmachhawn ṭum khan, Rashford chungah hremna hi lekkawh a nih avangin starting eleven-ah dah a ni lo. Season liam ta pawh khan Wolves nen an inhmachhawn dawn ṭumah Rasfhord hi thawhhai vangin bench-ah dah a ni tawh bawk.

Blackburn striker hlui Chris Sutton chuan, "Ten Hag aiin Old Trafford-ah a awm rei ka ring. Mahse, hetianga chetsual reng hi chu a dik lo. Ten Hag leh a teammate te chunah zahna a lantir lo," tiin a sawisel.

England striker Alan Shearer leh Leicester City defender Conor Coady te pawhin Marcus Rashford-a chet dan chu hriatthiam har an tih thu an sawi ve bawk.