Match hmasa ber chiah ka ngaihtuah - Khalid Jamil

Indian Super League chu chawlh reng a nih hnuah zanin aṭangin khelh ṭan a ni leh dawn ta a, zanin dar 7:30 hian match hmasa berah Jamshedpur leh NorthEast United an inkhel ang - JFC boss Khalid Jamil-a'n a club hlui a hmachhawn dawn tihna a ni.

Khalid Jamil hi January-ah Jamshedpur hian la lutin, season tawp thleng atan contract an ziahpui a, inbuatsaihna pawh nei hman loin Indian Super Cup hmachhawn nghal mah se semifinal a luhpui thei.

I League-a Aizawl FC champion puitu boss hi Mizo club nen pawh an indawr leh hman a, a tawpah erawh ISL club sawmna a pawm ta zawk. Khalid chuan, "Tun dinhmunah chuan, 'chu chu kan ti ang' tiin engmah ka intiam thei lo a, ka ngaih pawimawh hmasak ber chu kan match khelh hmasak ber tur hi a ni.

"Chumi zawhah chuan kan hmachhawp zel tur kan thlir thei chauh ang. Highlander lakah result ṭha tak kan hlawhchhuah a ngai a ni," a ti a, Guwahati club lakah a team chu hnehna chanpui ngei a tum tih a sawi.

Kum 46 mi Khalid hi mi tam tak chuan Indian football coach ṭha ber ang hialin an chhal - player a nih laia a career tawp a hmanna Mumbai FC aṭanga coaching ṭanin, I League club hi season sarih chhung chu budget nei tlem tak chungin top flight league a khelhpui reng thei.

Kum 2016 khan Aizawl FC enkawlin, season khat lek a enkawl chhungin I League nomawi a chawipui - hetihlai hian I League hi top flight league a ni a, player ṭha rualin an la khelh vek bawk avangin Khalid-a hnathawh hi a ropui hle.

East Bengal chuan AFC aṭang hian thlem chhuakin, vaibelchhe 1.25 an hlawhtir a, I League-a Indian coach hlawh hnem ber record a siam. Mahse, Kolkata club-ah a hlawhchham hnuin ban a ni a, January 2019 khan season chanve chhung atan Mohun Bagan a zawm.

Bagan-ah a contract pawtsei loin, June 2019 khan NorthEast United chu assistant coach leh head of academy ni turin a zawm a, ISL 2019-20 season-ah Highlander hian Robert Jarni chu banin, Khalid hian season tawp thleng a enkawl zui.

NorthEast hian 2020-21 season-ah coach nghet atan Gerard Nus la lut leh mah se, season laihawlah an ban a, Khalid hi manager lailawk atan ruat nawn a ni. Match 10 chhung a zawna an tlawm loh hnuah Highlander hi playoff a hruai thleng hial a, a hnathawh a ropui hle.

October 2021 khan Highlander hian a nghetin Khalid hi coach atan an ruat zui a, Indian coach zinga ISL club coach nghet ni hmasa ber ni mah se beisei a phak zui lo. June 2022-ah I League 2nd division club Bengaluru United a zawm leh a, June 2023-ah chhuahsanin Nepal Super League club Chitwan a zawm.

Mahse, Nepali club hi a kaihhruai tak tak hmain a chhuahsan leh a, tunah chuan ISL-ah a kir leh ta. Khalid chuan, "Hun ṭha pek ka ni hi ka lawm a, JFC ka enkawl thei hi ka lawm takzet. ISL-a ka lo kir thei hi ka lawm a, ka chance neih hi ṭha taka chhawr ka tum.

"Highlander kan tum dawn a, ka club hlui a nih avangin kan inbuatsaihna erawh a danglam phah lo. Team ṭha tak an ni - kan intawng tawh a, an khel ṭha khawp mai," a ti - Super Cup-ah khan Highlander hi Jamshedpur chuan 2-1 in an lo hneh tawh a, Khalid a fimkhur loh phah lo.

Men of Steel hian defender pahnih Ricky Lallawmawma leh PC Laldinpuia chu Mizo player an kawl a ni a, Highlander hian midfielder Fredy Chawngthansanga leh forward Rochharzela an kawl thung.