Champion lai Senegal an tla

Senegal chuan AFCON nomawi an kawl lai an humhim thei lo. Africa Cup of Nations 2023 thlengtu Ivory Coast chuan Senegal hi penalty shootout-ah 5-4 a hnehin last 16 aṭangin an pet chhuak a ni.

Senegal hian group match an khel ṭha, chak vek thei awmchhun an ni. Sadio Mane awmna ram hi champion leh tura rinkai an ni a, last 16-ah pawh bul an ṭan fuh hle. Minute lina lekah Habib Diallo chuan Mane siamsak hmangin goal a khung nghal.

Beisei anga inelna hmang ṭha lo Ivory Coast lamin mipui puihna dawng ṭha viau mah se an nawr let hleithei lo. Hun tawp dawnah erawh an vannei hlauh, hun tawp hma minute li chauh awm tawhah Franck Kessie-a'n si phurh a sut, 1-1 in inkhel a tawp.

Extra time an khelh zawh hnuah pawh goal dang a lut zui lo, penalty aṭangin chak zawk zawn a ni. Senegal tan Moussa Niakhate-a'n penalty a hlah a, inelna thlengtu Ivory Coast tana pettu ten an khung vek thung.

Ivory Coast coach lailawk Emerse Fae chuan, "Kan nihna tak kan lantir niah ka ngai, goal kan chhuah hma avangin na takin min nghawng. Team tam tak ni se la chuan an bei let thei lo ang, mahse ka naute khan a nih dan tur takin an bei let," a ti.

A thlengtu Ivory Coast hian quarterfinal-ah chuan Mali leh Burkina Faso te inkhela chak zawk an hmachhawn leh ang, nizan khan last 16 khelh zawh niin chanchinbu buatsaih laiin result kan hre kim hman lo thung.

Thawhṭanni zan last 16 inkhel dangah Cape Verde chuan hun tawp dawn ṭepa Ryan Mendes-a penalty hmangin Mauritania 1-0 in an hneh a, a vawi hnih nan AFCON quarterfinal an lut, anni hian Morocco leh South Africa inkhela chak zawk an hmachhawn leh thung dawn a ni.