Pahnihnaah bawk Sabalenka

Hmeichhe tennis thuneitu sang Women's Tennis Association (WTA) chuan world ranking thar a ti chhuak a, inelna lian neih zawk tak Australian Open champion Aryna Sabalenka chu a dinhmun ngai pahnihnaah bawk a awm.

Sabalenka hian Qinwen Zheng hnehin a nomawi kawl lai a humhim a, kum 2013 hnu lamah hmeichhe player zinga Australian Open title hum thei hmasa ber a ni hial. Champion lai a nih avangin a ranking point neihsa a humhim a ngai a ni.

Chak lo mah se Zheng chuan nasa takin hma a sawn. Li Na hnua Chinese nula zinga Australian Open final khel leh thei hmasa a ni a, player pariat ngawt kal kanin world number 7 dinhmun a luah - a sang zual 10 zinga a tel vawi khatna a ni nghal bawk.

United States nula Coco Gauff leh Jessica Pegula te chuan player pakhat ve ve an kal kan a, pathumna leh palina dinhmun an luah. Season hmasa Australian Open finalist Elena Rybakina chu a hnungtawlh hret thung a, panganaah a awm.