Arsenal tan Jesus a inlar e!

Goal a hlu vek a, hlu bik erawh a awm ṭhin - Arsenal tan Nottingham Forest lakah Gabriel Jesus-a goal kha a hlu bik zinga mi a ni ang, a ṭhianpa Bukayo Saka tan a siamsak bawk avangin Gunners tan Jesus hlutna a sang takzet.

Premier League champion tum Arsenal hian Thawhlehni zan khan Nottingham Forest 2-1 in an hneh, league hmahruaitu Liverpool nena an inkar an sawr zim leh rih, tun kar tawpah Reds hi an mikhual zui dawn - English football a nung leh vet vet khawp ang.

Nizan khan champion lai Manchester City leh Liverpool te an inlan a, Citizens hi an chak a nih chuan pahnihna aṭangin Gunners an nek chhuak leh rih dawn a ni.

Awlsam lo

City Ground hi Mikel Arteta tan hmun nuam a ni lo, kum 2022 FA Cup khel turin Arteta naute an lenglut - rinkai zawk ni mah se an chak lo. Season hmasa khan EPL khel tuin an lut leh a, an chak loh avangin nomawi an beiseina a thamral zui bawk.

FA Cup aṭanga an tlak ṭhum hian Arteta chuan, "Kan chak lohna chu ka pawm thei, mahse khatiang em ema khelh chhiat kha chu pawm theih a ni lo," tiin a naute a lo hau tawh a, a tan Nottingham Forest khelmual hi hmun nuam a ni mawlh lo.

Tun ṭumah pawh hian goal khung an harsat leh tlat a, chawlhlawk hmain goal an nei lo. Martin Odegaard leh Saka ten mawi taka ball an inpek hnuah Jesus-a'n bar a tihper a, a hmain Brazil international hian bar chung hretah a kheng chhuak bawk.

Saka pawhin remchang nei mah se goalkeeper Matt Turner a chesual duh tlat lo, harsa tak chung pawhin anmahni lama goal lut tur a lo dang hram zel. Emile Smith Rowe leh Odegaard te pawhin Forest tlarhnung an ṭhiat hleithei lo.

A hunah Jesus

Goal khung harsat vanga buai ṭhin Arsenal hian Crystal Palace lakah goal nga an khung zo chauh a, mahse Forest lakah an buaina ngai bawk a la reh lo tih a lang. Ball chang tamin inkhel thunun viau mah se a hmawr an bawk thei lo chu an buaina a ni.

Minute 65-na a ni a, defender Oleksandr Zinchenko-a'n rang deuhin a theh (throw) a, striker Jesus-a'n box sir lam aṭangin a la lut, defender leh keeper an awm avangin hmun ruak a tlem, mahse Turner-a kapkar ruak a hmu fuh, a goal theih dan awmchhunin a khung!

Arsenal ṭantute leh Arteta an thaw huai ang, counter attack hmangin an hlauhawm zui. Jesus-a hnen aṭanga a ball hmuh chu Saka-a'n a khung leh a, English forward hian tun hnaia amah sawisel ṭhintute chu goal hmangin a chhanglet.

Goal hnih an khungah Jesus a pawimawh ve ve a, an goal hnuhnung zawk luh dawna Odegaard-a ball fing leh a hmathlir thui tak sawi hmaih theih a ni lo. Player nazawngin an thlir phak loh a thlir phak leh tlat ṭhin.

A tawp buaina

Goal hnih an neih hnuah Arsenal an thlamuang a, mualneitu Forest lam an ṭang thar thung. Zinchenko-a'n ball kangah a ven a hneh lo a, defender palian William Saliba-a'n a lo chhutsual hret bawk karah Taiwo Awoniyi-a'n si phurh a rawn sut.

Hun tawp dawnah substitute Awoniyi bawk a hlauhawm a, buai nuaih karah hnai tak aṭangin a volley hram a, goalkeeper David Raya chuan a lo dang hlauh - Gunners an thaw huai ang. Goal an chhuah danah erawh Ben White leh Zinchenko te ngaihdan a inhmu lo, an inbakkaih zui.

Arsenal manager Arteta chuan, "An khelh danah duhkhawp lohna lai an nei ve ve a, goal kan chhuah danah khan an lawm lo, chumi chu an inhrilh tawn a ni. Tun aia ṭha zawk khan khelh an duh tihna a ni a, ka lawm zawng tak a ni," a ti.

Spanish manager hian hamrik hnuhnung ber a rik hnuah hnehna an chan chu nasa takin a lawm, tun hmain vawi hnih a chetsual tawhna hmun a nih avangin a tan chuan hnehna hlu leh lawmawm zinga mi a ni phak ngei ang.

Inkhel dang

Thawhlehni zan Premier League inkhel dangah Luton Town chuan an mikhual Brighton & Hove Albion chu 4-0 in an sawp. Elijah Adebayo-a'n hattrick a siam bakah Chiedozie Ogbene-a'n a khung bawk a, 17-naah inhlangkaiin relegation zone an chhuahsan.

Luton hian minute khatnaah Adebayo hmanga khungin, minute thumnaah Ogbene chuan a belhchhah. Kum 1998 April thla khan Leicester City chuan Derby lakah a tir lam minute thum chhungin goal hnih an lo khung tawh - Foxes hnua hetiang ti leh thei hmasa an ni.

Everton leh Fulham te goal awm lo 0-0 in an inhnehtawk a, inkhel dangah Luton an lo chak si avangin Everton hi tla thei dinhmunah an ding ta chiah. Match khata khel tam zawk chungin Luton hi point khatin an phak lo.

Toffees hi sum hman leh lakluh dan inbuk tawk lo vanga hrem an ni a, league point 10 an hmuhsa paihsak an ni. Hrem an nihna hi khinglet mah se thiam an chang dawn em, tih hriat a la ni lo, English team hlun berte zinga mi hi an dinhmun a ṭha rih lo hle.