Mipui 2000 hmaah Everton-in Chelsea an hneh

Inrinni zan khan Goodison Park-ah che chhe laklawh Everton leh che ṭha chho mek Chelsea an inkhel a, Frank Lampard-a hote hi chak ngei tura ngaih ni mah se Carlo Ancelotti hote 1-0 in an chak ta zawk.

Toffees tan hian Gylfi Sigurdsson-a'n minute 22-naah penalty aṭangin goal awmchhun a khung a, Italian manager Ancelotti chuan entu mi 2,000 chu danglamna siamtu a nih thu a sawi.

London club tan keeper Edouard Mendy a che ṭha ṭhin a, Everton lakah erawh a chesual. Toffees forward Dominic Calvert-Lewin ball lalut chu Mendy-a'n va su chawrhin penalty a chawi.

English midfielder Mason Mount-a'n second half ṭan deuh chiahah crossbar a pet per. Toffees an hlauhawm ve reng tho a, Richarlison-a'n keeper Mendy hna a siamsak a, Calvert-Lewin-a'n penalty a hlawhchhuak leh bawk. Amaherawhchu VAR hmanga enlet hnuah Calvert-Lewin hi a offside hman avangin penalty hi sut leh a ni.

Chelsea vanneih zan a ni lo a, Mason Mount-a'n freekick aṭangin goal ban a pet per leh bawk. Blues an chak loh avangin hmahruai theihna hun ṭha an bawhpelh a, Frank Lampard-a hoten point 22 hmuin an hnuaia awm Leicester City, Southampton leh Manchester United ten khelh zat inangah an lehpel thei a ni.

Toffees manager Carlo Ancelotti chuan, "Mipuiin danglamna an siam. Entu kha 2,000 chauh ni mah se minti hlim a, player-te beiseina siamtu an ni. Stadium khat ṭhapa inkhelh leh hun a nghahhlelhawm hle," tiin a sawi. 

Everton hian match hnuhnung pasariha vawi khat chiah an chak hnuah chak hmel an hmu leh ta a, Nilaini zan hian Leicester City hmachhawn turin King Power Stadium an tlawh ang.

Chelsea hian season an hman ṭhat avangin Premier League champion thei tur zinga sawi an ni a, Jurgen Klopp leh Jose Mourinho te pawhin London club hian player an neih ṭhat thu an sawi tawh. 

Frank Lampard chuan, "Squad nei ṭha ber anga kan team an sawi hi chu a dikhlel deuh a ni. Kum li chhung thlir let ila, khata champion team te khan winger leh forward ṭha tak tak season khata goal 30-40 khung thei an kawl. League chauh ni loin Champions League thlenga champion tawh te an ni," tiin champion rinkai anga sawi a duh loh thu a sawi.

Blues hian inhliam vanga khel lo winger pahnih Christian Pulisic leh Hakim Ziyech te awm lo an tuar tih a lang. Thawhlehni zan dar 11:30 hian Lampard-a hote hian khualmualah Wolverhampton Wanderers an hma-chhawn ang.