International transfer-ah sum sen a tam

Football khawvela thuneitu sang ber FIFA-in a tarlan danin kum 2023 chhunga club-ten international transfer-a sum an sen zat belhkhawm chu pound tluklehdingawn 7.6 a tling - kum 2022 aṭanga teha a punna chu 48.1% a ni a, record ding lai, kum 2019-a lo siam tawh chu £1.6tld-in a khum!

English club-te chu kum 2023-a ram pawn aṭanga player lakluh nana sum seng hnem ber an ni a, anni hian £2.3tld an seng - international transfer tih hian, ram chhunga player transfer a huam tel lo a, ram dang aṭanga player lakluh a kawk bik. Hetianga ngaihtuah chuan English club-te insenna hi a tam fal hle.

European footballer langsarte thlem lut a, league ropui tak din tuma sang mar mek Saudi Arabia chu England tih loha ram pawn player lakluh nana sum seng hnem an ni a, nikum khan Saudi club-te hian international transfer tih nan £765mtd zet an seng.

Saudi hian free transfer-a player hrawl tak tak an lak bakah man neiin Neymar, Allan Saint-Maximin, Aleksandar Mitrovic leh Fabinho te ho an la lut a, hei vang hian an sum sen hi a tam lo thei lo.

Covid-19 vangin kum 2020 leh 2021 khan player transfer-a sum sen a tam lo a, mahse, boruak a zia leh chiah chu football khawvelin sum a seng hnem hle. Nikuma international transfer fee aṭanga sum hmu hnem ber chu German club-te niin £950mtd an dawng a, France (£940mtd), England (£820mtd) leh Italy (£810mtd) lam pawhin an tawng hnem hle.

International transfer-a player to zual top 10 chuan kum 2023 international transfer-a sum che vel 10% an hauh pha hial a, heng zingah hian Jude Bellingham-a'n Borussia Dortmund aṭanga Real Madrid (£88.5mtd) a pan te, Enzo Fernandez-a'n Benfica aṭanga Chelsea (£107mtd) a pan te leh Rasmus Hojlund-a'n Atalanta aṭanga Manchester United (£72mtd) a pante chu a tel.

Kum 2023-a international transfer man sang zual 10 zingah hian English club paruk chu a leitu club an ni a, England hian international transfer fee-ah sum a hmuh hnem tluk zetin a sen lam pawh an huai a ni ber.

Hetihrual hian nipui transfer-ah an che na viaute a nih ngawt loh chuan, kum 2024-a English club-te sum sen hian kum 2023 hi chu a phak loin a rinawm - Premier League club-te tun thlasik transfer-ah an thawm a reh hle.

January 2023 leh kum 2022 & 2023 nipui transfer-te khan transfer-a sum sen tam record thar an siam vek a, January 2024-ah erawh he thu buatsaih a nih thleng hian Premier League club-ten player 13 chiah an la lei a, heng zinga pariat chiah hi a ngheta club zawm niin, a bak panga erawh loan kaltlangin a ni thung.

Player 13 lei nana sum sen belhkhawm hi £45.4mtd chauh a ni a, kum dang ngaihtuah chuan a tlem hle. Premier League thlasik transfer hi naktuk zing dar 4:30-ah khar a ni dawn a, transfer lian tham thawm a awm loh avangin min barakhaih thei thil a thlengin a rinawm chiah lo.

Hmeichhe football lamah pawh sum sen a hraw ve zel a, nikum khan kum 2022 aiin hmeichher international transfer chu 20% in a pung a ni. Kum 2023-a hmeichhe international transfer awm zat hi 1,888 a tling a, a hma kumah 1,571 a ni thung - kum 2023-a international transfer bika sum sen hi £4.8mtd a tling a, record ni mah se, mipa football nena a inthlauhna hi la sang vet vet tak a ni.

Nikuma hmeichhe football international transfer-a sum sen tamna langsar zingah, Jill Roord-i'n Wolfsburg aṭanga Manchester City a panna te (£300,000), Kyra Cooney-Cross-in Hammarby aṭanga Arsenal a zawmna te (£140,000), Lindsey Horan-i'n Portland Thorns chhuahsan a, Olympique Lyonnais a panna te (£214,000) chu a tel.