Magpies an chak ve ta

Newcastle United chuan Premier League-ah hnehna an chang ve leh ta, an league match hnuhnung palia an tlawm vek hnuin Aston Villa chu 3-1 in an hneh a, point thum hlu tak an hlawh chhuak.

Villa Park-a inkhelah Magpies tan defender Fabian Schar-a'n goal hnih a khung a, defender Alex Moreno chuan anmahni lamah a tilut palh bawk. Goal thum an chhuah hnuah Villa striker Ollie Watkins-a'n khung ve mah se awmzia a nei phak tawh lo.

Magpies manager Eddie Howe chuan, "Ka naute khan sawisel tur awm lo khawpin an khel ṭha, ka lawmna dang leh chu tuna kan boruak ang hi kan tawng khat tawh hle a, hlimna kan tawng ve leh ta hi a ni," tiin a sawi.

Villa erawhin an chunga mite hnaih theihna remchang an bawhpelh a, dinhmun ṭha takah la ding mah se an elpui Liverpool, Arsenal leh Manchester City te an chetsual ṭhat duh loh avangin champion sawi ngam a harsa ang.

Aston Villa manager Unai Emery chuan, "A tir aṭanga minute 60 thleng kha chuan team ṭha zawk an ni a, a hnu lamah erawh kan ṭha zawk thung. Point khat chauh tal hlawh chhuak tura goal kan khung tam lo kha a pawi hle.

"Hmasawnna tur lai a la tam hle, khelh dan phung ṭha zawk pawh kan hmu zel ang," a ti. Villa hian an match hnuhnung panga zinga paliah point an hloh a, team hmuhnawm tak ni mah se Champions League khelh phak ringawt pawh thil lawmawm a ni ang.