Man United khingpui tur Wolves

Zanin dar 1:45 hian Molineux Stadium-ah Wolverhampton Wanderers-in Manchester United an mikhual dawn. Erik Ten Hag-a nauten FA Cup-ah Newport County 4-2 in an hneh hram a, nomawi beiseina an chhi nung.

Amaherawhchu Man United hian season thara Champions League khelh an tum a nih chuan zanin an inkhel tur hi an ngaih pawimawh a ṭul a, Wolves lakah point thum an hlawhchhuah a ṭul ang.

Newport County laka Man United khelh dan ṭha tawk lo mah se Casemiro, Luke Shaw, Harry Maguire leh Lisandro Martinez te an inlan leh theih tawh avangin lawmna tur a awm.

FA Cup-a inlan lo Marcus Rashford a inlan theih tawh a rinawm a, AFCON aṭanga Cameroon an tlak tawh avangin goalkeeper Andre Onana pawh chhawr theihin a awm leh tawh bawk.

Mahse, Wolves hian match sarih chhung hneh loh an tawng tawh lo. Asian Cup vangin Hwang Hee-chan chhawr thei rih lo mah se Pedro Neto, Matheus Cunha leh Pablo Sarabia te an kawl a, Man United tan point thum hmuh a harsa ang.