Son-a telna South Korea an kal zel

Asian Cup 2023-ah South Korea chuan champion rinkai zinga mi Saudi Arabia chu hun pangngaia 1-1 a an chelh hnuin penalty shootout-ah 4-2 in an hneh. Son Heung-min a telna South Korea hian quarterfinal-ah team ṭha Australia an hmachhawn dawn.

January 30, Thawhlehni inkhel dangah Uzbekistan-in Thailand 2-1 in an hneh a, Uzbekistan hian quarterfinal-ah inelna thlengtu Qatar an hmachhawn ang. Nizan khan last 16 khelh zawh a ni a, result kan hre kim hman lo.

South Korea an vannei

Education City Stadium-a inkhelah goal chance hmuh tur a awm lawk lo. Minute 40-naah Saudi Arabia-in corner kick aṭangin South Korea an rum ṭhaih a; Saleh Alshehri leh Ali Lajami ten a zawn zatin crossbar an tauh per a, Salem Aldawsari-a'n goal pawn chiahah a tauh zui bawk.

Second half-ah inkhel a ṭan chauh a, Saudi Arabia-in South Korea tlarhnung an ṭhiat nghal. Bench aṭanga lut Abdullah Radif-a'n a luh aṭanga second 34-naah goal a khung nghal.

Al-Shabab forward Radif-a hi a nung chhunzawm a, South Korea tlarhnung tan a hnawk hle. Hun tawp lamah South Korea goal bawh a na chauh a, Hwang In-beom-a goal khung tur chu keeper Ahmed Al-Kassar-a'n a dang ṭha takzet.

South Korea an khel ṭha zel a, goalkeeper Al-Kassar pawhin hna a ngah. Injury time-ah bench aṭanga lut Cho Gue-sung-a'n crossbar a tauh per a, Wolves forward Hwang Hee-chan pawhin a hun ṭha neih chu box pawnah chiah a pet.

Injury time-ah pawh minute kuanaah Cho Gue-sung-a'n si phurh a sut a, South Korea hian group stage-ah pawh injury time-ah ṭum hnih goal an khung tawh.

Extra time-ah pawh South Korea-in chance ṭha bik an nei a, Lee Kang-in ball pet ṭha chu Saudi keeper-in a dang ṭha takzet. Saudi-in injury time-ah chakna goal khung theihna remchang an nei a, Radif-a'n keeper zawnah a pet.

Penalty shootout-ah South Korea tan pet hmasa bertu Son Heung-min-a'n a khung a, midang pawhin an khung vek. Saudi lamah erawh Al-Najei leh Ghareeb ten an khung lo a, South Korea keeper Jo Hyeon-woo chu 'hero' a ni. Roberto Mancini kaihhruai Saudi Arabia champion beiseina a tawp.

Uzbekistan an chak

Uzbekistan leh Thailand te hi Asian Cup final round-a an inhmachhawn hmasak ber a ni a, qualifying round-ah erawh inhmachhawn tawhin Uzbekistan an chak. Tun ṭumah pawh Uzbekistan-in bul an ṭan ṭha a, inkhel an thunun a, minute 37-naah an thunun rah an seng.

Minute 37-naah Azizbek Turgunboev-a'n box chhungah ṭha taka la thlain mawi zetin Uzbekistan hmahruaina goal a khung. First half-ah goal a luh belh lo a, second half-ah erawh Thailand-in si phurh an sut. Substitute Supachok Sarachat-a'n minute 58-naah mawi zetin box pawn aṭangin a pet lut.

Mahse, Abbosbek Fayzullaev-a'n minute 65-naah box pawn aṭang thoin Uzbekistan hmahruaina goal a khung a, goal dang lut belh tawh loin Uzbek hi 2-1 in an chak zui bawk.