Hyderabad an talbuai - player hlawh an pe thei lo

Indian Super League club Hyderabad FC chuan sum lamah harsatna nasa tak an tawk mek a, ISL club hian player leh staff-te hlawh an pek theih loh avangin player engemaw zat an chân a, ram pawn player phei chu pakhat chiah an nei tawh!

Tun hnaiah khan All India Football Federation (AIFF) hnuaia player status committee chuan Chinglensana Singh, Nikhil Poojary, Hitesh Sharma leh Nim Dorjee te chu Hyderabad-a an contract tihtawp theihna a pe a, hei hi club-in hlawh mumal a pek theih loh vang a ni.

Hyderabad hian tun season-ah league match 11 khel tawhin chak an la nei miah lo a, vawi li draw neiin, point li an hmu tawh a, table mawngphah an luah mek. An chung chiaha awm Punjab FC aiin point li laiin an hniam zawk - match khatin an khel tlem thung.

Buaina chu

Hyderabad coach hlui Manolo Marquez chuan season ṭan dawn khan Hyderabad-ah sum vanga harsatna an tawh thu a lo sawi tawh a, 2022-23 season tawp lam kha an hlawh an lak theih bawk si loh avangin an tan chuan a harsat takzet thu a sawi.

Spanish coach thusawi hi Hyderabad neitu zinga mi Varun Tripuraneni chuan chhangletin, "Manolo thusawi a dik a, thla engemaw chen kha chu kan talbuai a ni. Mahse, player, coach leh staff ṭha tak takte inpekna zarah kan buai lutuk lo a, hmun dangah ni se chuan kan tal chhuak kher lo mai thei," a ti.

Tripuraneni hian Hyderabad-ah buaina an neih thu a pha lo a, chutihrual chuan 2023-24 season-ah chuan he buaina hi chinfel ni tawh tura beisei a nih laiin a tawpkhawk a thleng mek - player, coach leh staff ten hlawh an la thei lo.

Kian zai rel lo...

2023-24 season-ah chuan Hyderabad buaina hi kiang tawh tura ngaih a nih laiin zual lam a pan a, an dinhmun a duhawm lo takzet. Nikum khan Jamshedpur FC nen an inkhelh ṭuma an thlenna hotel bill chu Hyderabad hian an pe lo a, FIR thehluh a ni!

Hyderabad club hian Hotel Ramada-ah zan thum riakin, room 23 zet an book a, advance-in cheng nuai khat pe mah se, a hnuah bill an pe zui lo. Hotel hian club thuneitute chu biak pawh tum mah se, biak pawh theih an ni lo a, FIR an thehluh phah.

Hei chauh a ni lo - staff ṭhenkhat hlawh la loin an buai mek a, club bus khalhtu takngial pawhin training ground-a player-te hruai loa chawlh mai a duh tawh! Club staff ṭhenkhat chu player-ten anmahni pawisain an pui ang hiala sawi a ni.

A tawk ta e

Indian player langsar Chinglensana Singh, Nikhil Poojary, Hitesh Sharma leh Nim Dorjee te dawhtheihnain a tlin ta lo a, AIFF hnenah an kal. AIFF lamin dan ang thlapin an duh huna an contract an tihtawp a phalsak a, player pali hian Hyderabad an chhuahsan vek.

Kum 27 mi Chinglensana hian Bengaluru FC a zawm zui a, kum nga leh a chanve khel turin contract a ziak. Nim Dorjee chuan a pu hlui Manolo-a hnuaia khel leh turin FC Goa a zawm a, mahse, a contract hi tun season tawp thleng atan chauh niin an sawi.

Hetihlai hian Hitesh Sharma chuan Odisha FC zawmin, kum hnih leh a chanve chhung atan contract a ziak a, Nikhil Poojary chu Bengaluru, East Bengal leh Mumbai City nen sawizawm a ni thung - he thuziak i chhiar chuan a kalna tur a chiang tawh ang.

A harsa

Hyderabad hian tun dinhmunah chuan captain Joao Victor chu ram pawn player an neih chhun a ni tawh a, a bak zawng chuan hlawh an hmuh loh avangin ISL club-a an contract titawpin an chhuahsan - Indian football tan thil mualpho thlak tawpkhawk a ni.

Coach Conor Nestor an lakluh tirhin an thawm ring viau mah se, Irish coach hian an league match hmasa pasarih hnuah khan a enkawl tawh lo nia sawi a ni a, December 30 khan Nestor hian Hyderabad a chhuahsan thu social media kaltlangin a puang chiang ve bawk.

Hyderabad hi Manipur coach Thangboi Singto hnuaiah an awm mek a, zanin dar 7:30 hian ISL match khel turin FC Goa an mikhual dawn - player naupang rual leh foreign player pakhat chauh nei chungin an inlan dawn. Hyderabad-ah hian midfielder pathum Lalchhanhima Sailo, Mark Zothanpuia leh Ramhlunchhunga chu Mizoram player awm an ni a, tun hnaiah Jeremy Zohminghlua, Joseph Lalrinawma Sailo, Amosa Lalnundanga leh Aron Vanlalrinchhana chu senior squad-ah dah an ni bawk.

Sum che vel

ISL club-te hian kum khatah club kalpui nan cheng vaibelchhe 30-50 inkar an seng tlangpui nia sawi a ni a, ISL club-te hian kum tinin ISL huaihawttu Football Sports Development Ltd (FSDL) hnenah vaibelchhe 12-16 inkar chu franchise fee an pe ṭhin bawk - player leh staff hlawh bakah, zin veivahna leh hotel thlen man nen kum khata sum sen hi a tam lo thei lo.

Indian top flight league hian central revenue pool tih chu an nei a, hei hi ISL aṭanga sum hmuh tlin khawmna niin, club-ten an insem ve leh ṭhin. Season hmasa khan ISL club-te hian cheng vaibelchhe 16 ṭheuh an insem thei nia sawi a ni a, tun season-ah hian central revenue pool hi a pung hle tura ngaih a ni.

Hetiang a nih avang hian I League champion avanga ISL khel thei club tan franchise fee pek ngai lo mah se, Punjab FC chuan pek an thlang zawk a, central revenue pool aṭanga sum an lakluh ve duh vang a ni. Mahse, central revenue pool aṭang bak hian ISL club-ten sum lakluhna an nei meuh lo a, ISL club tam zawk hi kum tin sum hlohin an la kal.

A neitu

Hyderabad FC hi mi pakhat chauh ta ni loin Varun Tripuraneni, Vijay Madduri leh Rana Daggubati te inṭawm a ni. Varun hi football khawvelah a mikhual lo hle - Football Development Head (Kerala Blasters), Chief Operating Officer & Head of Operations (Chennaiyin FC) leh Chief Executive Officer (Kerala Blasters) te a lo ni tawh a, a hausakna zat chiah hi hriatchian a ni lo.

Vijay Madduri hi Incessant Technologies-ah CEO niin, kum khata a company thawhchhuah hi dollar maktaduai 22.8 vel nia sawi a ni a, Rana Daggubati hi Telugu actor lar niin, dollar maktaduai ruk vel hausakna nei anga sawi a ni a, ISL club meuh enkawl tur chuan mi pathum hausakna belhkhawm hi a tam tawk lo, tiin a sawi theih.

Hyderabad boss hlui Manolo chuan, "Investor thar an awm tur thu an sawi reng a, mahse, tuman an awih tawh lo," tiin a club hlui hi a sawi hial - Hyderabad club hi an tlachhia a nih ngat chuan Indian football tan chanchin lawmawm lo tawpthang a ni ang.