Morocco hnehin South Africa an tlang

Achraf Hakimi-a'n si phurh sut theihna remchang ṭha a nei, mahse hun tawp dawna an penalty hmuh chu a hlah tlat. Hakimi awmna Morocco chu South Africa lakah 2-0 in an tlawm, champion tura rinkai ni mah se last 16 paltlang zo loin an zinkawng a tawp.

South Africa tan Evidence Makgopa chuan minute 57-naah goal a khung, goal luh hma hian Makgopa chu offside niin a lang - Video Assistant Referee (VAR) hmanga rei tak an ennawn hnuah erawh goal atan an pawm.

Qatar World Cup semifinal hial thleng thei Morocco lamin goal khung an harsat tlat a, minute 85-naa an penalty hmuh phei chu hun ṭha lehzual bik a ni. Amaherawhchu, an player ṭha bik Hakimi-a'n a hlah tlat si a ni.

Hun tawp hma deuhin Manchester United midfielder Sofyan Amrabat chu hnawhchhuah a ni a, a tawp lamah goal phur zawk Morocco an kim lo. AFCON 2025 an thleng dawn a, kum 1976 a hlawhtlinna an chan kha chhunzawm turin an ramah theihtawp an chhuah a ngai dawn - hei erawh nghah rih a ngai.

AFCON 1996 champion South Africa erawhin kawng dik an zawh a, kum 2019 hnua a vawi khat nan quarterfinal an lut leh ta chiah. Inrinni zanah Cape Verde nen semifinal luh inchuhin an intawng zui leh ang.

Morocco coach Walid Regragui chuan, "Champion tumin inelna kan hmachhawn a, a tir aṭanga a tawp thleng khan theihtawp kan chhuah. AFCON hi inelna awlsam lo tak mai a ni a, beisei loh result pawh kan hmu hnem hle," tiin a sawi.

Thawhlehni zan inkhel dangah Mali chuan Burkina Faso 2-1 in an hneh a, beisei phak baka inelna khel ṭha Mali hian quarterfinal-ah chuan Ivory Coast an tum leh dawn a, tournament thlengtu lakah thilmak tih chhunzawm an tum ngei ang.