Sikkim lakah Mizoram chak

Cricket inelna Col. CK Naidu Trophy (Mens Under - 23) khelh mekah Cricket Association of Mizoram (CAM) team chuan Sikkim chu run 200-in an hneh a, semifinal lut turin an dinhmun an siam ṭha.

Nadiad-a khelhah Sikkim hi ṭhum vawrah vannei zawkin vawm hmasak an thlang. Mizoramin thawhkhatna (1st innnings) ah run 170 siamin an out vek. Ramhlun Venglai rawlthar Johan Lalbiakkima chuan run 63 a siam a, Kulikawn player Sahil Reza (run 23) leh Sahil Sharma, Ṭhuampui (run 21) te'n an thawhhlawk hle bawk.

Sikkim lamin bat ve thungin run 116-ah an out vek. Sikkim lakah Mizoram bowler Sahil Sharma chuan wicket nga lain, K.Vanrotlinga chuan wicket thum a la bawk.

Thawhhnihna (2nd innings) ah Mizoramin bat lehin run 261 siamin an out kim - Sikkim tan target run 316 an tuksak. Innings 2-ah hian Mizoram tan captain B. Lalnunfela, Hunthar Vengin run 67 siamin a siam hnem ber. Target umtu Sikkim chu Mizoram player-ten run 115 lekah vawm hlum vekin, Mizoram hi run 200 laiin an chak ta a ni.

Mizoram team hian group stage-a an match hnuhnung ber khel turin February 4, Pathianni hian Manipur an tum leh ang a, an chak chuan semifinal an lut ang - an chak lo a nih erawh chuan midang result-ah an innghah a ṭul ang.