Davies-a'n Real pan a tum lo

Real Madrid-in nipui transfer-a lakluh tuma an hel mek Alphonso Davies chuan a club khelh mekna Bayern Munich chhuahsan tumna a neih loh thu a sawi a, Davies chuan, "He hmun hi nuam ka ti. Club ropui tak, Europe-a ṭha ber pawlah ka khel a ni," a ti.

Canadian full back hian kum 2025-ah a contract a hmang zo tawh dawn a, thla 18 bak hun a nei tawh lo. Bayern hian contract thar zawrh mah se, Bayern-a player hlawh hnem pawl nih a duh avangin a pawm lawk duh lo a, Real an lo lang vat.

Mahse, Davies hian a rilru a thlak niin a lang a, kum 23 mi defender chuan, "Ka game-ah chiah ka rilru ka pe a, he team leh fan te tan hian ka theihna zawng zawng ka hlan zel dawn a ni," a ti a, Real bakah amah duhtu langsar Chelsea tan pawh hriat a nuam lo ang.

Kum 23 mi Davies hian tun season inelna hrang hrangah match 26 khel tawhin, goal khat a khung bakah assist vawi thum a nei a, footballer tam takin khelh an châkna Real hian nipui transfer-ah thapui thawhin rim ngat se, a ṭang rei thei kher ang em, tih erawh sawi lawk theih a ni lo.

Real hian zanin dar 1:30-ah league match khel turin Getafe an lenchilh dawn a, La Liga table-ah pahnihna an ni mek. Hmahruaitu Girona chu point khatin an phak lo mek a, match khatin an khel tlem thung - Real tan nipuia an player it zawng lakluh nan nomawi chawi a pawimawh ang.