Ka chawl mai lo ang - Murray

Andy Murray chuan tun hnaiah result ṭha nei thei lo mah se tennis chawlhsan mai a la tum lo a, a infiamna ngainat tak mai chu a theih anga rei khelh chhunzawm a la tum tih a sawi bawk.

World number 1 hlui hian kuminah chak a la nei lo. Australian Open 2024 aṭanga a tlak nghal hnuah Open Sud de France a khel zui a, chak nei loin a zinkawng a tawp leh nghal bawk a ni.

Grand Slam vawi thum champion tawh Murray chuan, "Hun harsa tak ka tawk mek a ni, mi tam tak chu ni se la chuan inkhelh pawh an chawlhsan tawh ngei ang. Mahse kei chuan mite rilru put ang hi ka pu ve lem lo.

"Ka chawl mai dawn lo, ka theih anga rei chu nasa takin ka bei zui dawn, engtiang chena thui leh rei nge ka kal theih dawn tih erawh ka sawi lawk thei bik lo thung," tiin a sawi.

Murray hi player ṭha bikte zinga mi a ni a, theihna pawh a nei sang. Mahse, Roger Federer leh Rafael Nadal te nen an vanglai a inrual a, a hnu hretah Novak Djokovic a rawn lang bawk, nomawi lian a chawi tam tur angin a chawi tam tawk lo tia sawi theih a ni.