Chelsea tan Liverpool an sang - inkhelh an lo zirtir!

"A sang em a, ka phak lo a ni..." tih hla ang mai a ni a, Chelsea tan Liverpool an ṭha lutuk hret. Nilaini zan khan Anfield-ah an leng a, dawl zawrin an zawr haw - Premier League hmahruaitu hian 4-1 in inkhelh an lo zirtir. Jurgen Klopp-a tan league match 200-a Liverpool a chakpuina chiah a ni a, match 318 bak a mamawh lo.

Team pahnih hi League Cup final-ah an la intawng dawn a, Nilaini zana team pahnih inkhel thlirtu Chelsea fans tan chuan nomawi beisei zui a har khawp ang - naupang leh puitling inkhel ang mai an ni a, Reds-in table chung ber an luah chhunzawm zel.

Liverpool tan Diogo Jota, Conor Bradley, Dominik Szoboszlai leh Luis Diaz ten goal khat ṭheuh an khung a, Chelsea tana Christopher Nkunku goal khung chu mualpho zualpui khuhna chauh a ni - Reds tan Darwin Nunez chuan penalty a hlah mah mah!

A tawi zawnga sawi chuan Liverpool hi an vanneih zan ni se, goal li aia tam khung thei dinhmunah an ding a, hei hian table-a an inthlauh tluk zetin khelmualah Liverpool leh Chelsea an inthlau tih a hrilhfiah.

A tir aṭangin...

Anfield-a inkhelah hamrik a rik rualin Liverpool-in inkhel an thunun nghal a, minute 45 chhunga player khawhar ber thlang dawn se Alisson a ni hial ang - Reds keeper tan Chelsea lamin hna an siam lo a, keeper rilru pe lo deuh tan phei chuan mutchhuahna hman hial a ni!

Liverpool erawhin Chelsea keeper Dorde Petrovic tan hna an siam mawlh mawlh a, Serbian keeper hi a lungleng hman meuh lo. Minute riatna lekah Nunez chuan chance duhawm a nei nghal a, box pawn aṭanga kawh zeta a pet chuan bar a per - a vanneih zan a ni lo.

Minute li a liam a, Nunez bawk kan hmu. Mahse, Uruguayan striker hian ṭha taka chance a insiam hnuah goal pawn lamah uiawm takin a pet a, Ibrahima Konaté siamsak ṭha zet Petrovic-a'n a khawih per avanga post per hram pawh uiawm a tling.

Nunez vanduai mah se Jota a vanduai ve lo. Portuguese forward hian Bradley hnen aṭanga a ball hmuh chu defender pahnih ven karah a khalh lut a, goal hmahruai khung nan a hmang - Chelsea tlarhnungin an hna an tlin lo a, minute 23-na a ni.

A hming Bradley

Liverpool tan rawlthar right back Bradley a langsar a, Trent Alexander-Arnold inhliam chhunga a hmun ruak luahtu hian Trent-a tih ang a tive thei tih pholangin, game boruak sangah goal a khung a, assist vawi hnih a nei bawk.

Curtis Jones-a 'shot' Petrovic-a'n ṭha taka a dan hnu leh, Nunez-a'n a vawi li nana chance a hlah hnuah, Bradley hi a inlar a, Luis Diaz-a ball siamsak chu ṭha taka a tlan luhpui hnuah Petrovic-a tana dan rual lohin goal kil sirah a thlawh lut.

Mahse, Nunez-a tan erawh hun duhawm a her chhuak thei lo. Jota-a'n penalty a hlawhchhuah chu a pet turin Nunez hi a lo pen chhuak a, Uruguayan striker hian post pet per nan a hmang. A changtupa aiah a 'ṭhelhtupa' a nih chhunzawm zel.

Goal dang lut loin chawlhkawk hman a ni a, Blues tan Mykhailo Mudryk chuan chance nei ve zuk mah se, Alisson chiah a hmachhawn chungin a pet 'over' - Liverpool-in Chelsea an hrem zui a, Bradley-a ball pek ṭha lutuk chu Szoboszlai-a'n chiang zetin a tauh lut.

Beiseina thamral

Chelsea an reh reng bik lo. Second half-a bench aṭanga luhtir Nkunku chuan ṭha zeta Liverpool defender-te a bum hnuah si phurh sutna goal a khung ṭhen a, Chelsea fans mu tawh ṭhenkhat an tho ṭha leh a, beiseina an nei thar.

Mahse, Chelsea beiseina chu enge ni? Chhum rei lotê langa ral leh ang mai hi a ni a, an hlimnain minute 10 pawh a daih lo. Minute 79-naah Nunez-a siamsak ṭha lutuk chu Diaz-a'n tlu chungin goal-ah a chantir a, 4-1 a ni der!

Chelsea tan beiseina a thamral zui a, Anfield-ah dawl zawrin an zawr. Liverpool hian an goal lina an khung hma hian chance hlauhawm vawi hnih ngawt an nei leh hman a, Nunez chuan uiawm taka post tauh perin, Harvey Elliott-a chance neih chu Petrovic chuan ṭha lutukin a dang bawk.

Liverpool-in League Cup final-a an hmachhawn tur Chelsea lakah nuamsain hnehna an chang a, Núñez erawhin vawi li ngawt woodwork tihperin, Premier League match khata woodwork tihper hnem ber record a siam!

Hmabak hautak

Anfield-ah kawng tinrengin Liverpool an chungnung zawk a, chutihrual chuan Blues tan chhuanlam tur zawn chuan chhuanlam tur a awm ve tho. Virgil van Dijk-a'n Conor Gallagher leh Nkunku te a tihtluk avangin Blues-in penalty an beisei a, mahse, referee-in an ngaihdan a ṭawmpui lo.

Jurgen Klopp-a'n Reds a chhuahsan tur thu a puan hnuah Liverpool-in match hnih an khel tawh a, FA Cup fourth round-ah 5-2 a Norwich City hnehin, Chelsea chu 4-1 in an sawp leh ta - Merseyside club hian Mohamed Salah tel lo pawhin goal khung kawngah harsatna an tawk lo.

Liverpool hian Chelsea hmaa an league match hnuhnung berah Bournemouth chu 4-0 in an sawp bawk a, Pathianni zan dar 10:00-a league match khel tura an lenchilh tur Arsenal tan a hmuhnawm lo khawp ang.

Chelsea erawh an league match hnuhnung pathuma an chak vek hnuah an tlawm ve leh ta a, Pathianni zana an hmachhawn tur chu Liverpool hmaa league-a an ngam loh hnuhnung ber Wolverhampton Wanderers a ni - Mauricio Pochettino-a'n hnathawh tur tam tak a la nei tih chu Anfield aṭanga 'home work' atana a hawn a ni.