Son tel lohna Spurs an chak

Tottenham Hostpur-in Nilaini zan khan Brentford an mikhual a, 3-2 in an hneh. Ange Postecoglou hoten Asian Cup leh Afcon vangin player ṭha an chan a, inhliam vangin buai bawk mah se hun harsaah point thum an hlawhchhuah avangin a sang pali zingah an awm.

Bees hi Ivan Toney rawn kir vangin an phur a, team tum châkawm loh an ni. Spurs lakah pawh Toney hian a hun ṭha neih chu goal-ah pet pawpin goalkeeper Guglielmo Vicario tih per chu Neal Maupay-a'n minute 15-naah a khung. Hemi hma hian VAR hmangin Brentford goal khung pawmsak an ni tawh lo.

Spurs an talbuai rei lo a, goal khat an chhuah hnuah ben harhin an awm. James Maddison leh Rodrigo Bentancur te hmangin mual lai an thunun a, Timo Werner leh Richarlison te goal hmaah an hlauhawm hle.

Mualneitu lamin halftime an hmang ṭha a, second half-ah minute 11 chhungin goal thum an khung. Minute 48-naah Werner-a ball pek chu Destiny Udogie-a'n siphurh sut nan a hmang.

Minute khat hnuah Dejan Kulusevski ball pek chu Werner-a'n lalutin German forward cross shot chu Brennan Johnson-a'n goal ruakah a khung. Spurs an phur zel a, minute 56-naah Maddison-a thawhrah chu Richarlison-a'n a khung.

Son Heung-min awm lo chungin Spurs-in goal thum an khung thei a, hei hi chak nan a tawk. Chutihrualin nuam sa takin an chak lo. Udogie-a back pass sual chu Toney zawnah chiah a kal a, English forward hian minute 67-naah siphurh a sut ṭhen. Goal dang a luh belh tawh lo a, Spurs 3-2 in an chak.