Man City an tho chhuak tak tak ta

Manchester City-in nikum kum tawpa FIFA Club World Cup nomawi an chawi hmain an chesual a, November leh December thla tir chhung ringawtin point 11 an hloh. Mahse, Pep Guardiola hote an tlu rei lo a, Club World Cup zawh hnuah match ruk an chak zawn leh tawh a, match li Premier League a nih avangin league-ah pawh Arsenal aia match khata khel tlemin pahnihna dinhmun an luah leh tawh.

Pep Guardiola hoten Nilaini zan khan Etihad Stadium-ah Burnley 3-1 in an hneh a, Julian Alvarez-a'n goal hnih a khung bakah Rodri-a'n goal khat khungin point thum hmu turin harsatna an tawk lo. Man City tana chanchin lawmawm chu Erling Haaland a dam tawh a, bench aṭangin a inlan leh ta bawk.

City hian nung takin inkhel bul an ṭan a, Kevin de Bruyne freekick chu an chance neih hmasak ber a ni. Argentine forward Alvarez-a'n a kum 24 pian champha phak lawm nan minute 16-naah goal hmahruai a tauh lut a, minute 22-naah KDB-a freekick fing zet chu Alvarez-a'n goal khung nan a hmang leh bawk.

Etihad Stadium-ah City an chungnung a, goal hnih an khung hnuah pawh Clarets an nawr bet. Second half ṭan chiahah Phil Foden ball pass chu Rodri-a'n mawi zetin goal kilah a pet lut a, Burnley player-ten goal an khawih hman lo.

Bench aṭanga lut Haaland pawhin goal khung theihna a nei a, a chawlh rei deuh vang nge, goal hmaah a la bil hle. Goal thum khung hnuah City an inthlahdah hret a, Clarets-in goal khungna chance an nei a, injury time-ah an khung ta bawk. Injury time-ah Ameen Al-Dakhil-a'n goal a khung a, Man City right back Josko Gvardiol-a'n a hna a thawk tawk lo.

Man City hian February 5, Thawhṭanni zanah Brentford an tlawh agn a; February 10, Inrinniah Everton an mikhual ang. Premier League match hnih khelh zawhah Champions League an khel ṭan leh tawh ang a, Man United pettlatu Copenhagen nen Last 16-ah an inhmachhawn dawn.