Punjab-ah Isaac-a a lut

Odisha FC midfielder Isaac Vanmalsawma chuan I League champion Punjab FC a zawm a, tun season aṭanga ISL khel club-ah hian season tawp thleng atan contract a ziak.

Isaac chuan, "Odisha-ah coach thar a lo lut a, player a chhawm tel bakah khelh duh dan a nei a, khelmuala hun tam zawk hman duhin Punjab club hi ka zawm ta a ni," tiin Vanglaini a hrilh.

Shillong Lajong aṭanga professional zinkawng zawh ṭantu Isaac hian Pune City, Chennaiyin FC, Jamshedpur FC leh Odisha tan ISL a lo khel tawh a, Indian top flight league-ah hian match 90 khela goal thum khungin, assist vawi nga a nei tawh.

Season hmasa lawk pawh khan Odisha tan league match 20 zet khelin, goal khat leh assist vawi khat a nei a, tun season-ah erawh coach thar Sergio Lobera hnuaiah hmun a chang phak lo.

Hetihlai hian Punjab-a Mizo player awm sa Brandon VL Remdika chuan ISL club hi a chhuahsan thung a, I League club Sreenidi Deccan FC a zawm. Punjab club-ah hian striker Daniel Lalhlimpuia a awm mek bawk.