Rome khawpuia Colosseum-ah Sinner : Number 1 nih tum zinkawng chu...!

Rome Sipaite tual chaina hmun, hmanlai pasalṭhate chet tlatna hmun - Gladiator rothap tak takten ennawm an lo chhuah tawhna Colosseum-ah ngei mai Jannik Sinner a lut a, hmanlai chu ni se Rome mipuiten ropui takin an lo hmuak ngei ang.

Tunah chuan thawnthu a danglam tawh a, Italian mite ngaihsan leh dah ropui ni mah se hmanlai angin Colosseum boruak hran a awm tawh lo a, a ram mite thinlungah erawh a la tla na reng - Sinner pawhin Australian Open nomawi a chawi nen a pan a, amah thlahtute a theihnghilh lo.

Tennis season khat chhunga tournament lian hmasa ber Australian Open-ah Sinner a champion a, Italian tlangval zingah chuan Adriano Panatta hnua Grand Slam champion leh thei hmasa ber a ni, kum 48 hnuah an nghak chhuak leh chauh tihna a ni.

Naupang kawlhrawng

Italy hmar lama tlang hual vel kara awm South Tyrol chu Sinner-a seilenna hmun a ni a, an awmna hi Austrian ramri dep niin vur a tla nasa ṭhin. A naupan lai chuan vur tleng (skiing) a uar hle a, kum riat mi lek a nih laiin vur tawlhah hian national champion a ni phak hial.

Skiing bakah football a khel a, heng mai bakah hian tennis a khel bawk - naupan lai aṭanga infiamna ngaina leh atchilhtu a ni. Kum 13 a lo tlin chuan tennis huangah a kal bing chho a, coach Riccardo Piatti kaihhruaina hnuaiah a hun puma tennis khel turin a inbuatsaih.

A pa Johann-a hi Italy hmarchhaka awm Talschlusshutte Restaurant-ah ei siamtu (chef) a ni a, a nu Siglinde-i chu a pa thawhna hmunah tho chuan eitur lo sem kualtu (server) a ni thung a, khawsak awlsam leh nuamsa an ni hran lo.

A nu leh pain ni tina hna an thawh avangin a pi leh pu bulah chhun lam hun a hmang ṭhin. Pi leh pu bula khawsa chu duatsual an awl tih ang kha Sinner hian a nei ve lo, thawkrim tur leh harsatna paltlang thei turin a rilru an lo chher hriamsak zawk a ni.

In a chhuahsan

Tennis a luhchilh tak tak hian kum 14 mi a ni a, coach ṭha Riccardo Piatti hnena training tur chuan an chenna in aṭanga kal chhuah a ngai a, tah chuan puitling tura a inchher a ngai, kum naupang sawi a remchang tawh lo.

Sinner chuan, "Hun rei lote chhungin ka puitling ni mai hian ka hria. Ei leh in tur ka siam a ngai a, ei rawngbawl bakah hian insuk leh inchhung tihfai ka tih a ngai vek. A tirah chuan harsa ka ti ve hle a, a hnuah erawh a tana harsatna siamtu a ni lem lo thung.

"A nihna takah chuan kum 14 mi chauh nih laia ka nu leh pa kalsana training kha chu hrehawm pawh ka ti ve hle. Amaherawhchu, ka nu leh pate khan an thiam leh phak ang tawkin min thlawp tlat a, anni bakah hian ka unaupa pawhin tun hun ka thlen theih nan min pui nasa," a ti.

Piatti Tennis Center-ah rim takin a training a, a chhungte a hmuh khat em avanga lunglen leh hrehawm tih chang pawh a nei ve tho. Amaherawhchu, eng emaw changa an inhmuh ve zauh ṭhinte chu a tana hun hlu bik a nih thu a sawi bawk.

A puitling zel

Rawlthar a nih aṭangin hriam tak ni tura chher a ni bawk a, kum 20 a tlin chhoh chuan Sinner hi a puitling chho tawh viau. French Open 2020 khan quarterfinal a thleng a, a hnuah Wimbledon semifinal leh US Open quarterfinal a lut tawh bawk.

Australian Open 2024 an khelh meuh chuan kum 22 mi a ni tawh a, hneh theih loh ang maiin Melbourne khawpuiah a ding nghet. A champion kalkawngah hian world number 1 Novak Djokovic a hneh a, set hnih a hloh hnuah Daniil Medvedev a lehthal leh bawk a ni.

Sinner-a coach Darren Cahill chuan, "Final kha boruak sang leh hmuhnawm tak a ni a. Tun ṭuma mi hi a paltlang lo a nih chuan nakin zelah inelna liana champion a harsat tur thu ka hrilh a, chu chuan a rilru a tipaukhauh zual ni pawhin ka hria.

"Carlos Alcaraz-a'n player naupang zawkte pawhin Grand Slam title an la thei tih a takin a rawn lantir a, ani anga ṭha a nih theih thu leh Carlos aia ṭha zawk pawh a nih theih hial thu ka hrilh, chu chuan kan infuih," a ti.

Number 1 nih duh

Mipa tennis thuneitu sang Association of Tennis Professionals (ATP) ranking chhuak thar berah khan Sinner hi world nunber 4 a ni, a chungah Djokovic, Carlos Alcaraz leh Daniil Medvedev te an la awm - number 1 ni turin hna a la hautak dawn.

Kum 18 mi lek a nih lai khan Sinner hian, "Italy ramah chauh ni loin, khawvela a ṭha ber nih ka duh," tiin a sawi tawh ṭhin. Australian Open champion a nih hnuah pawh a thil tum hi a la danglam chuang lo, a sang bera awm a duh.

Italian tlangval Sinner chuan, "Ka duhthusam chu a la pangngai reng, inelna lian Grand Slam champion nih hi a ni. Major title hi a tam thei ang ber lak ka duh a, chumi tur chuan ṭha taka training leh leh thuai thuai pawh ka duh.

"Tun hma lama ka lo sawi tawh ang khan khawvela a ṭha ber nih duh ka ni a, chumi tur chuan theihtawp pawh ka chhuah ang," a ti. Theihna a nei sang a, a rilru a paukhauh bawk - set nga khel turin a dawhthei bawk, hlawhtlinna lian dang a chan belh ngei pawh a rinawm.

Khelh dan phung

Italy ram aṭanga chawr chhuak a ni bawk a, midang ang bawkin clay court chu a inkhelh thiamna hmun a ni. Baseline aṭanga na tak taka ball vaw let thei a ni a, kut khing hnih hmanga backhand ṭhin niin Rafael Nadal ang bawka 'Topspin' hmang thiam a ni.

6ft 2in a sang niin service nei ṭha tawkin a lian, ṭuan muang khawpa lian fal erawh a ni lo thung. A service hi 221 km/h (137.3 mph) zeta nate a ni thei a, hei hi a hmanraw hlauhawm a ni - Australian Open khelh zawh takah khan final hma chuan a service a hloh lo!

Grand Slam-ah chuan best of five hmangin chak an zawng ṭhin a, player thinchhia leh dawhthei lo tan chuan hlawhtlin a harsa. Sinner-a hi Roger Federer nena tehkhin a ni ṭhin, a kum la naupan ngaihtuahin a thin a nel hle.

Tun hma deuh khan Federer chuan, "Sinner bika ka duh em em chu a forehand leh backhand hi a nat zawng a inang deuh reng thei a, chu bakah a chiai ngai lo hi a ni," tiin a lo fak tawh a, a theihna leh amaha thil awm a lo hmu chiang hle tihna a ni.