Quarterfinal-ah Japan leh Iran

Japan-in Asian Cup quarterfinal lut turin January 31, Nilaini zan khan Bahrain 3-1 in an hneh a, an khingpui tur chu Syria hnehtu Iran a ni.

Japan nge nge

Japan-in group stage-ah Iraq hneh loin an group-ah pahnihna ni mah se last 16-ah team ṭha bik an nihzia an pholang. Samurai Blue khingpui hi group E hmahruaitu Bahrain an ni a, 3-1 in an hneh.

Vawi li champion tawh Japan-in South Korea chunga awm thei Bahrain lakah an theihna tak tak an lantir a, ṭan phat aṭangin an goal bawh a na zawk. Feyenoord forward Ayase Ueda-a'n corner kick aṭanga a ball hmuh chu goal zawnah tauh mah se goalkeeper Ebrahim Lutfalla-a'n a dang.

Minute 31-naah Seiya Maikuma-a'n box pawn aṭangin kawh zetin goal ban a pet per a, hemi per hi Ritsu Doan-a'n changin Japan goal hmahruai khung nan a hmang.

Minute 49-naah Bahrain tlarhnung an chesual a, left back Hazza Ali-a'n an lamah tiperin, hemi per hi Takefusa Kubo zawnah chiah a tla. Real Sociedad winger Kubo hian a hun ṭha neih chu hmang ṭangkaiin Japan goal hnihna a khung.

Japan goalkeeper Zion Suzuki-a'n nam over a tum chu a nam sual a, an goal bulah bawk a tla thla, hemi ball hi Ayase Ueda leh Suzuki ten inchuhin Japanese forward hian an lamah a tauh lut.

Bahrain-in si phurh sut ṭhen mah se Japan an chunung chhunzawm a, Ayase Ueda-a'n a tihsual thup bo nan minute 72-naah a khung belh. Hun tawp thlengin Japan zawkin goal chance an neih belh a, Samurai Blue-in an phu ang ngeiin 3-1 in hnehna an chang.

Iran an vannei

India-in group state an paltlang lo a, point pawh an hmu lo. Chutihrualin Syria laka India chak lohna zat chu 1-0 chauh a ni. Mizo defender Lalchungnunga chuan, "Asia team ṭha kan hmachhawn bakah team ṭha dang inkhel kan en bawk. Kan inthlauhna a tam tawh lo a, technique-ah kan tluk loin ka hria," tiin Vanglaini a hrilh.

Chungnunga thusawi dikna chen a awm, Hamara Desh-in 1-0 chauha an hneh loh Syria-in minute 120 chhungin team ṭha Iran an chelh. Penalty shootout-ah Iran 5-3 in an vannei ta zawk.

Abdullah bin Khalifa Stadium, Doha-a inkhelah team ṭha zawk Iran an chungnung zawk a, goal erawh an khung thei bik lo. Syrian defender Aiham Ousou-a'n mawlmang zeta Mehdi Taremi a nam thluk avangin penalty a chawi. Taremi hian minute 34-naah penalty spot aṭangin hmahruaina goal a khung.

Second half-ah pawh Iran an chungnung a, Sardar Azmoun-a'n chance ṭha bik a hlah. Syria tana bench aṭanga lut Pablo Sabbag-a'n a luh aṭanga minute hnihna lekah penalty a hlawh chhuak a, Omar Khribin-a'n minute 64-naah si phurh sutna goal a khung a, 1-1 a ni.

Hun tawp thlengin Iran-in an nawr bet a, goal hmuh tur erawh a awm tawh lo. Mahse, injury time-ah Taremi-a'n goal venhim a tumna lamah Syria substitute Alaa Aldeen Al Dali a titlu a, yellow card vawi hnihna hmuin an hnawt chhuak.

Extra time a nih meuh chuan Syria dinhmun a ṭha leh tawh zawk a, mahse an tamna an hmang ṭangkai thei lo. Penalty shootout hmanga chak zawk zawn a ni a, Syria winger Fahd Youssef ball pet chu Iran keeper Alireza Beiranvand-a'n a dang. Iran tana pettu zawngin an pet lut vek a, quarterfinal khel turin an tling.