Barcelona leh Atletico Madrid an chak

Kum 18 mi Vitor Roque chuan Barcelona tana a goal hmasa ber a khung a, Osasuna lakah Catalan club chu 1-0 in hnehna a chanpui - La Liga table-ah palina an nih chhunzawm a, hmahruaitu Girona an phak lohna chu point riat a ni.

Hetihlai hian Atletico Madrid chuan 2-1 in Rayo Vallecano an hneh ve bawk a, table-ah pathumna an ni - Barcelona nen an point hmuh zat a inang a, Diego Simeone-a naute pawhin champion an la beisei chhunzawm ve zel.

Atletico tan hian Reinildo Mandava leh Memphis Depay ten goal khat ve ve an khung a, Rayo Vallecano tana Alvaro García goal khungin awmzia a nei phak lo - nizan khan Real Madrid-in Getafe an lenchilh a, an result kan hre hman lo.

Chak mamawh

Barcelona-in an league match hnuhnung berah Villarreal chu 5-3 ngawtin an ngam lo a, coach Xavi-a'n season tawpah Catalan club a chhuahsan tur thu a sawi zui. Barca-in chak an mamawh a, a bik takin coach Xavi tan chak a ṭul lehzual.

Mahse, inkhel ṭan aṭanga minute ngana lekah forward Ferran Torres chu hliam vanga lakchhuah a ngai a, Barca an che fuh dawn lo niin a lang. Barca hian inkhel thunun viau mah se a pawimawh ber goal khung an harsat zui a, an khelmualah fans an hlauthawng.

Catalan club tan hian Jules Kounde chuan corner aṭangin chance ṭha vawi hnih zet a nei a, mahse, bar chungah a tauh ve ve avangin Barca-in goal khung loin chawlhlawk an hmang.

Rawlthar duhawm Roque

Barca-in tlarhmaah Robert Lewandowski nei mah se, mamawh chhanna erawh kum 18 mi Vitor Roque a ni - season ṭan dawna contract ziahpui tawh, thlasik transfer-a Barca pan ve chiah Roque hian Joao Cancelo cross ṭha zet chu goal-ah a chantir.

Roque hi a awm mai mai lo. Minute 67-naah Osasuna defender Unai Garcia chu Roque lakah a foul a, red card pek a ni. Player kim loin Osasuna an khel zui a, mahse, Barca hi nuamsain an chaktir chuang lo.

Hun tawp nan minute 15 chauh a awm tawh tihah Raul Garcia chuan uiawm takin woodwork a pet per a, Jon Moncayola chance neih duhawm chu Barca keeper Inaki Pena chuan ṭha zetin a dansak bawk.

Atletico an chak

Girona laka an tlawm hnuah Atletico Madrid-in league match thum a zawnin hnehna an chang ve leh ta a, Nilaini zan inkhel dangah Rayo Vallecano chu 2-1 in an hneh - minute 90-naa an goal avangin an chak hram thung.

Diego Simeone-a team tan hian Reinildo Mandava chuan minute 35-naah goal hmahruai a khung a, mikhual team tan Alvaro Garcia chuan minute 42-naah si phurh hi a sut - goal dang a luh lawk loh avangin team pahnih hi an inhnehtawk mai dawn niin a lang hman.

Mahse, minute 90-naah Memphis Depay inlarin, chakna goal a khung a, Vallecano tan chhanglet turin hun a tam tawk tawh lo - Atletico an vannei a, point thum hlu tak an hlawh chhuak.